ދުނިޔޭގެ އެންމެ އުސް އިމާރާތުގެ ވަށައިގެން، ޖައްވުގައި ވަށް ބުރެއްގެ ސިފައިގައި ބިނާކުރާ ހަރޮށި ބިނާއެއްގައި، ކުރިމަގުގައި އެތައް ހާސް ބަޔަކު ދިރިއުޅޭނެ އެވެ. ދުބާއީގެ ބުރުޖް ޚަލީފާގެ ވަށައިގެން ބިނާ ކުރާ ވަށް ބުރުގެ ހަރޮށި ބިނާއަކީ، 1،800 ފޫޓު އުހުގައި ޖައްވުގެ ތެރޭގައި ބިނާ ކުރާ ސިޓީއެކެވެ.
މި ސިޓީގެ ފަރުމާ ވަނީ ސިކުނޑިތަކުން ކަރުދާހަށް ތިރިކޮށް ނިންމާފައެވެ. މިވަގުތު މި މަޝްރޫއަށް ނަން ދީފައި ވަނީ، "ޑައުންޓައުން ސާރކަލް ޕްރޮޖެކްޓް"ގެ ނަމުން ނެވެ.
ލަފާ ކުރެވޭ ގޮތުގައި، ރާއްޖޭގައި ސަރުކާރު ޚަރަދުގައި ބިނާ ކުރާ 10 ބުރި އިމާރާތެއް ނިންމާ ވަރަށް ވުރެން މަދު ދުވަސްކޮޅެއްގެ ތެރޭގައި މި ހަރޮށި ބިނާގެ މަސައްކަތް ނިންމާލެވޭނެއެވެ.
މި ވަށް ބުރު ސިޓީ ބިމުން މައްޗަށް ނަގަނީ 5 ތަނބެއްގެ މަތީގައެވެ. އަދި މުޅި ބުރު ބިނާ ވެގެންވާނީ 5 ފަންގިފިލާއަށެވެ. އެތަންތާނގައި މީހުން ދިރިއުޅޭ ގެތަކާއި، ޝޮޕިން މޯލްތަކާއި ރެސްޓޯރެންޓްތައް ފަދަ ވިޔަފާރިތަކަށްވެސް ޖާގަ ހަދާފައި ހުންނާނެއެވެ.
މި ހަރޮށި ބިނާގެ ކުރެހުން ތައްޔާރުކޮށްފައި ވަނީ ޒެޑްނެރާ ސްޕޭސްގެ ޗީފް އާކިޓެކްޓުންގެ ތެރޭގައި ހިމެނޭ އާކިޓެކްޓް ނަޖްމުއްދީން ޗައުދްރީ އެވެ.
އޭނާ ކިޔައި ދިންގޮތުގައި މި ޑިޒައިން އޯކޭ ކޮށްފައި ވަނީ، މީގެ ދެއަހަރު ކުރިން ހުށަހަޅާފައިވާ ޑިޒައިންތަކުގެ ތެރޭން އެންމެ ސަޅި ޑިޒައިންގެ ގޮތުގައި ހޮވިގެންނެވެ.
ނަޖުމުއްދީން ބުނަނީ، މިއީ "ސިޓީއެއްގެ ތެރޭގައި އުފައްދާ ސިޓީއަކަށް ވާނެ" ސިޓީއެއް ކަމަށެވެ.
މިސިޓީއަށް ހަކަތަ ފޯރުކޮށްދޭނީ ސޯލާ ޕެނަލްތަކުގެ ޒަރީއާއިންނެވެ. އަދި މުޅި ސިޓީގައި ބޭނުން ކުރާނީ ސައްތައިން ސައްތަ އިރުން އުފައްދާ ހަކަތައެވެ.
