ކޮނޑޭ ކައުންސިލުން އިއްޔެ ބޭއްވި ބައްދަލުވުމެއްގައި، ރަށުގެ ދެކުނު ސަރަހައްދުގައި ދެ ބިކިނީ ބީޗް ކަނޑައަޅައިފިއެވެ. މި ނިންމުމަކީ ރަށަށް ޒިޔާރަތްކުރާ ޓޫރިސްޓުންނަށް ޚާއްސަކޮށްގެން ނިންމާފައިވާ ނިންމުމެކެވެ.
ކޮނޑޭ ކައުންސިލްގެ 4 ވަނަ ދައުރުގެ 188 ވަނަ ބައްދަލުވުމުގައި މި ނިންމުން ނިންމާފައިވާކަމަށް ކައުންސިލުން މަޢުލޫމާތު ދެއެވެ. މި ނިންމުމާ ގުޅިގެން، ކައުންސިލުން ވަނީ ގެސްޓްހައުސް ހިންގާ ފަރާތްތަކަށް އިލްތިމާސްކޮށްފައެވެ. އެގޮތުން، ޓޫރިސްޓުން އުޅޭ ވަގުތުތަކުގައި ބިކިނީ ބީޗްގެ ގޮތުގައި ކަނޑައަޅާފައިވާ ސަރަހައްދުތަކަށް އާންމުން ނުދިއުމަށާއި، ބިކިނީ ބީޗްގެ ގޮތުގައި ކަނޑައަޅާފައިވާ ސަރަހައްދުތަކަށް މެނުވީ ބިކިނީގައި މޫދަށް އެރި އުޅުމަށް ޓޫރިސްޓުން ފޮނުނުވުމަށް އެދިފައިވެއެވެ.
މި ނިންމުން ނިންމާފައިވަނީ ރަށުގެ ފަތުރުވެރިކަން ކުރިއެރުވުމަށާއި، ރަށުގެ އާންމު ރައްޔިތުންނާއި ފަތުރުވެރިންގެ މެދުގައި އޮންނަ ގުޅުން ރަނގަޅު ގޮތެއްގައި ދެމެހެއްޓުމަށް ކަމަށް ބެލެވެއެވެ.
އެ ކައުންސިލުން މި މަޢުލޫމާތު ހާމަކޮށްފައިވަނީ އާންމުކޮށް ނެރުނު އިޢުލާނަކުންނެވެ.
