ހަނގުރާމާއިގެ ޖަރީމާތައް ހިންގާފައިވާ ޒަޔަނިސްޓު ޓެރަރިސްޓު ސިފައިންގެ އެއް ހާހަށް ވުރެން ގިނަ މީހުންގެ ނަންތައް އިންޓަރނޭޝަނަލް ކްރިމިނަލް ކޯޓަށް ހުށަހަޅާފައިވާ ކަމަށް އިޒްރޭލުގެ ހާރެޓްސް ނޫހުން ބުނެފިއެވެ.
މި މީހުންގެ ނަންތައް ހުށަހަޅާފައި ވަނީ ބެލްޖިއަމްގައި މައި އޮފީސް ހުންނަ ހިންދު ރަޖަބް ފައުންޑޭޝަނުންނެވެ.
އިޒްރޭލުގެ ޕާސްޕޯޓުގައި ޒަޔަނިސްޓުންނަށް ޗުއްޓީއަށް ވަނުމަށް ހުއްދަ ކުޜާ ޤައުމުތަކުގައި ދަނީ ހިންދު ރަޖަބް ފައުނޑޭޝަންގެ ގޮފިތައް ހަދައިގެން، އެފަދަ ފަރާތްތައް އެތެރެ ވުމުން އެމީހުންގެ ބޯކޮޅު ބަލައި ހައްޔަރު ކުރުމަށް އަމުރު ހޯދުމަށް މަސައްކަތް ކުރަމުންނެވެ.
އެންމެ ފަހުން ޒަޔަނިސްޓުންގެ ސިފައިންގެ 11 މީހަކު އެކި ތަންތާނގައި ޗުއްޓީގައި އުޅެނިކޮށް އެމީހުން ހައްޔަރު ކުރަން އުޅޭކަން އެނގިގެން ފިލައިގެން އެތަންތަނުން ބޭރުވެފައި ވެއެވެ.
ހިންދު ރަޖަބް ފައުންޑޭޝަންގެ ވެބްސައިޓުގައި ބުނެފައި ވަނީ، އެޖަމުއިއްޔާއަކީ، ޒަޔަނިސްޓުންގެ ތެރޭން ހަނގުރާމައިގެ ޖަރީމާތައް ހިންގާފައިވާ މީހުން ޝަރީއަތަށް ހާޒިރުކުރުމަށް ހިންދު ރަޖަބުގެ ނަމުގައި އުފައްދާފައިވާ ޖަމުއިއްޔާއެއް ކަމަށެވެ.
ހިންދު ރަޖަބަކީ، އާއިލާގެ އިތުރު 6 މެންބަރަކާއެކު ތައްލިލްހަވާގައި ޝަހީދުކޮށްފައިވާ ކުޑަ އަންހެން ކުއްޖެކެވެ.
