ނާޒީ ޖަރުމަނުން ބޮޑުއަވަނުގައި ޔަހޫދުން އަންދާލި މުނާސަބާ ފާހަގަކޮށް، ޔަހޫދުންނަށް ދުނިޔޭގެ ހަމްދަރްދީ ހޯދުމަށް ކުރާ މަސައްކަތަށް ނޫނެކޭ ބުނެ ސްކޫލުތަކުން އެކަމުގައި ބައިވެރި ނުވާނެ ކަމަށް ބުނެފިއެވެ.
ޔޫރަޕްގެ ބައެއް އިސްކޫލުތަކުން ބުނެފައި ވަނީ، ދުނިޔޭގެ އެންމެ ބޮޑު ކޮންސެންޓްރޭޝަން ކޭމްޕް، ޣައްޒާގައި، ޒަޔަނިސްޓުން ފަލަސްޠީނު މީހުން ގެ ގަތުލުއާންމު، ކުރިއަށް ގެންދާއިރު، ބޮޑު އަވަނުގައި ޔަހޫދުން އަންދާލި މުނާސަބާގެ ބޭނުން ހިފައިގެން ހަމްދަރުދީ ހޯދުމަކީ ވަރަށް ދެފުށްކެހެރި ކަމެއް ކަމަށެވެ.
ޔޫރަޕްގެ ޔަހޫދުންގެ ޖަމުއިއްޔާތަކުން ބުނަނީ، މި ދުވަސްވަރު ދުނިޔޭގައި ޔަހޫދުންނާ މެދު އާންމު އިންސާނުންގެ ހިތުގައި ނަފްރަތު އިތުރު ވަމުންދާއިރު މިފަދަ ބޮޑު އަވަނުގައި ޔަހޫދުން އަންދާލި ހޮލޮކޯސްޓު މުނާސަބާގައި ބައިވެރި ނުވުމަކީ ޔަހޫދުންނާ ދެކޮޅުވެރި އަމަލެއް ކަމަށެވެ.
އަދި މި މުނާސަބާގައި ބައިވެރި ނުވާ ޔޫރަޕްގެ ސްކޫލުތައް ހުންނަ ގައުމުތަކުގެ އެޑިއުކޭޝަން މިނިސްޓްރީން އެ ސްކޫލުތަކަށް ބައިވެރިވުމަށް ބާރު އެޅުމަށް ވެސް ޔަހޫދުން ދަނީ ގޮވާލަމުންނެވެ!
އެމެރިކާއިން ވާގިވެރިވެ، ހަތިޔާރު ދީގެން، ޒަޔަނިސްޓުން ހިންގާފައިވާ ގަތުލުއާންމާއި ހަނގުރާމައިގެ ޖަރީމާތަކުގައި ޣައްޒާގެ އާބާދީގެ 22 އިންސައްތަ ރަޖިސްޓްރީން ފޮހެލައި އާބާދީތައް އެއްކޮށް ބިމާ ހަމަކޮށް، ހަސްފަތާލާއި ސްކޫލުތައް ނައްތާލައި، ލައްކައާ ގާތް ކުރާ އަދަދަކަށް މީހުން ޝަހީދުކޮށްފައި އޭގެ ދެގުނަ މީހުން ނުކުޅައްދާފައި 2 މިލިއަން މީހުން ބަނޑަށް ޖައްސާފައި ވެއެވެ.
