ޗައިނާގައި އުއިގޫރު މުސްލިމް އަންހެނަކު އޭނާގެ ކުދިންނާއި އަވަށްޓެރިއަކަށް ޤުރުއާނުން އާޔަތްތަކެއް ދަސްކޮށްދިން މައްސަލައިގައި 17 އަހަރަށް ޖަލަށް ލުމަށް ޙުކުމް ކޮށްފިއެވެ.
ރިޕޯޓްތައް ބުނާ ގޮތުގައި ސެއިލިހާން ރޯޒީ، 49، އަށް ހުކުމް އިއްވީ "ގާނޫނާ ހިލާފަށް ސިއްރުން ދީނީ ހަރަކާތެއް" ހިންގިކަމަށް ބުނެ އެވެ. ބުލާކްސޫ ޓައުންޝިޕް ގެ ކޮމިޓީގެ އޮފިޝަލަކު ރޭޑިއޯ ފްރީ އޭޝިއާ އަށް ކިޔައިދިން ގޮތުގައި ރޯޒީއަށް ޖަލަށް ލުމަށް ހުކުމް ކޮށްފައިވަނީ އޭނާ ދީން އުގަންނައިދޭން މަސައްކަތް ކުރުމުން، އެއީ "ގާނޫނާ ހިލާފު ދީނީ ހަރަކާތްތަކެއް" ކަމަށް ބުނެއެވެ.
އޭނާއާ ދެކޮޅަށް ހެކިބަސް ދިން ފުލުސް މީހާ ބުނެފައިވާ ކަމަށް ވަނީ، ނަމާދުގައި ކިޔުމަށް ރޯޒީ އެބަޔަކަށް ދަސްކޮށްދިނީ 10 އާޔަތެވެ.
ފާއިތުވި އަހަރުތަކުގައި ޗައިނާ ސަރުކާރުގެ ލީކުވި ލިޔެކިޔުންތަކާއި، އުއިގޫރުގެ ހައްގުތަކާ ބެހޭ ޖަމިއްޔާތަކުން އެއްކުރި މައުލޫމާތުގައި ބުނަނީ ދީނީ ހަރަކާތްތައް ޝިންޖިއާންގައި ހިންގުމުން މުސްލިމުން ކުށްވެރިކޮށް މުސްލިމުން "ރީ-އެޑިއުކޭޝަން" ގެ ނަމުގައި ހިންގާ އިސްލާހިއްޔާތަކުގައި ބަންދުކޮށްގެން ސިކުނޑި ދޮވެހަދާ ކަމަށެވެ.
އެތަންތާނގައި ތިބި ކުރީގެ ގައިދީންގެ ހެކިބަހުގެ މައްޗަށް ބިނާކޮށް، ބުނެފައި ވަނީ އެއީ އަނިޔާވެރިތަންތަން ކަމަށާއި މީހުންނަށް ދަރިން ނުލިބޭ ގޮތަށް ހަދާ ކަމަށާއި އަންހެނުން ރޭޕް ކުރުމުގެ އަމަލުތައް ވެސް ހިންގާ ކަމަށެވެ. މިކަންކަން ހިނގާފައިވާ ކަމަށް އދންނާއި އިންސާނީ ހައްގަށް މަސައްކަތް ކުރާ ޖަމުއިއްޔާތަކުން ބުނެއެވެ.
