ޔޫތު މިނިސްޓްރީން ހިންގާ ތަފާތު ޕްރޮގްރާމްތަކުގައި މަޢުލޫމާތާއި ތަމްރީނުތައް ދޭނެ ފެސިލިޓޭޓަރުން ހޯދުމަށް ފުރުޞަތު ހުޅުވާލައިފިއެވެ.
މިނިސްޓްރީން މިއަދު ނެރުނު އިޢުލާނެއްގައި ބުނެފައިވާ ގޮތުގައި 27 އަށް ވުރެ ގިނަ ދާއިރާއަކުން ފެސިލިޓޭޓަރުން ހޯދުމަށް ވަނީ ބޭނުންވެފައެވެ. މި ދާއިރާތަކުގެ ތެރޭގައި ވިޔަފާރިއާއި އިޤްތިޞާދު، ޞިއްޙަތު، ލައިފް ސްކިލްސް، ޑިޖިޓަލް ސްކިލްސް، ސައިބަރ ސެކިއުރިޓީ، ފައިނޭންޝަލް ލިޓްރެސީ، ފަތުރުވެރިކަމާއި ހޮސްޕިޓާލިޓީ، ވަޒީފާއަށް އެދޭ ސިޓީ ލިޔަން ދަސްކޮށްދިނުން، އިންޓަވިއުއަށް ތައްޔާރުކޮށްދިނުމުގެ އިތުރުން ކެރިއަރ ޕްލޭނިންގ، ލީޑަރޝިޕް ސްކިލްސް އަދި ވޮލަންޓިއަރިޒަމް މޯޓިވޭޝަން ހިމެނެއެވެ.
މީގެ އިތުރުން، ވާރކް އެތިކްސް، ކަސްޓަމަރ ސަރވިސް، ކެރިއަރ ގައިޑެންސް، ސައިން ލެންގުއޭޖް، ސައިކޮލޮޖިކަލް ފަސްޓް އެއިޑް، ލައިފް ސްކިލް ޓްރެއިނާސް، ޕިއަރ އެޑިއުކޭޓަރުން، ޞިއްޙީ ދާއިރާގެ ފަންނުވެރިން، ޑައިވިންގ އަދި ސްނޯކްލިންގ ސްކިލްސް، ޕްރޮޖެކްޓް ފައިނޭންޝަލް މެނޭޖްމަންޓް، ވިޔަފާރި ސްޓްރެޓަޖީ އަދި އުފެއްދުންތެރިކަން، ޕްރޮޖެކްޓް ޕްރޮޕޯސަލް ލިޔުން، ރަނގަޅު ވެރިކަމާއި މަދަނީ ތަޢުލީމު ފަދަ ދާއިރާތަކުން ވެސް ފެސިލިޓޭޓަރުން ހޯދުމަށް ވަނީ އިޢުލާންކޮށްފައެވެ.
ޔޫތު މިނިސްޓްރީން މަޢުލޫމާތު ދީފައިވާ ގޮތުގައި، މި ފުރުޞަތަށް ކުރިމަތިލާ ފަރާތްތަކުން ވަޒީފާއަށް އެދޭ ސިޓީއާއި ދިވެހި ރައްޔިތެއްކަން އަންގައިދޭ ކާޑުގެ ކޮޕީއެއްގެ އިތުރުން ވަނަވަރު، ތަޢުލީމީ ސެޓްފިކެޓްތަކުގެ ކޮޕީ، ޓްރާންސްކްރިޕްޓްގެ ކޮޕީ އަދި މަސައްކަތުގެ ތަޖުރިބާގެ ލިޔުންތައް ހުށަހަޅަންޖެހޭނެއެވެ.
