ރާއްޖޭގެ އިރުން ހުޅަނގުދެކުނު ބޭ އޮފް ބެންގަލް ސަރަޙައްދުގައި އުފެދިފައިވާ ކޮޅިގަނޑުގެ އަސަރު މާދަމާއިން ފެށިގެން ރާއްޖެއަށް ކުރާނެކަމަށާއި މުޅި މި ހަފްތާ ރާއްޖެއަށް ވިއްސާރަވާނެކަމަށް ބެލެވޭކަމަށް މޫސުމާ ބެހޭ ގައުމީ އިދާރާ (މެޓް) އިން ބުނެފިއެވެ.
މެޓުން މިހެން ބުނީ އެ އިދާރާއިން މިއަދު ނެރުނު ބަޔާނެއްގައެވެ.
އެ ބަޔާނުގައި މެޓް އޮފީހުން ބުނީ މި ކޮޅިގަނޑު ހުޅަގަށް ޖެހި ރާއްޖޭގެ ސަރަހައްދުގައި ބޯވިއްސާރަވިލާ އުފެދުމުގެ ފުރުސަތު ބޮޑުވާނެ ކަމަށް ލަފާކުރެވޭ ކަމަށެވެ.
އެހެންކަމުން 13 ޖެނުއަރީ އިން ފެށިގެން 18 ޖެނުއަރީއާ ދެމެދު ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށާއި މި ވިއްސާރައިގައި ބައެއް ރަށްތަކަށް ބޯކޮށް ވާރޭވެހުމާއެކު ގުގުރާނެކަމަށް މެޓް އޮފީހުން ބުނެފައިވެއެވެ. އަދި އާންމުވައި ގަދަވެ ކަނޑުތައް ގަދަވާނެ ކަމަށް ބެލެވޭ ކަމަށްވެސް ބުންޏެވެ.
މޫސުން ގޯސްވާނެކަމަށް ލަފާކޮށް މެޓް އޮފީހުން ނެރޭ އެންމެފަހުގެ މޫސުން ލަފާކުރާ ގޮތާއި މޫސުމީ ސަމާލާއި އިންޒާރުތައް އަދި ގެއްލުން ކުޑަކުރުމަށް އަޅަންޖެހޭ ފިޔަވަޅުތަކަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.
