ދިވެހިރާއްޖޭގެ އިސްލާމިކް ޔުނިވަރސިޓީ (އައިޔޫއެމް) އިން ށ. ފުނަދޫގައި އެކި ލެވެލްގެ ކޯސްތަކެއް ފަށަން ހަމަޖެހިފައިވާ ކަމަށް އައިޔޫއެމް ބުނެފިއެވެ.
އެގޮތުން ފުނަދޫ ކައުންސިލާ ގުޅިގެން އެ ރަށުގައި ކުރިއަށް ގެންދިއުމަށް ހަމަޖެހިފައިވާ ކޯސްތަކުގެ ތެރޭގައި ޤިރާޔަތު ލެވެލް 2، އަރަބިކް ލެންގުއޭޖް ލެވެލް 3 އަދި ޤިރާޔަތު ލެވެލް 4 ހިމެނެއެވެ.
މި ކޯސްތަކުގައި ބައިވެރިވުމުގެ ފުރުޞަތު ފުނަދޫގެ ރައްޔިތުންނަށް ވަނީ ހުޅުވާލާފައެވެ. ޤިރާޔަތު ލެވެލް 2 ގައި ބައިވެރިވާ ފަރާތްތަކުގެ ޝަރުޠުތަކުގެ ތެރޭގައި، ގްރޭޑް 6 ފުރިހަމަކޮށްފައި ހުރުން ނުވަތަ އުމުރުން 16 އަހަރު ފުރި، ދިވެހިބަހުން ވާހަކަދެއްކުމުގެ ޤާބިލުކަން ހުރުން ނުވަތަ ޤިރާޔަތު ލެވެލް 1 ފުރިހަމަކޮށްފައިވުން ހިމެނެއެވެ.
މި ކޯސްތަކުގެ މުއްދަތާއި ފީއާ ބެހޭގޮތުން އައިޔޫއެމްއިން ބުނެފައިވަނީ ޤިރާޔަތު ލެވެލް 2 ގެ މުއްދަތަކީ 6 މަސްދުވަސް ކަމަށާއި، މި ކޯހުގެ ފީއަކީ 1،820 ރުފިޔާ ކަމަށެވެ. އަދި ޤިރާޔަތު ލެވެލް 4 ގެ ކޯސްފީއަކީ 9،270 ރުފިޔާ ކަމަށާއި، އަރަބިކް ލެންގުއޭޖް ލެވެލް 3 ގެ ކޯސްފީއަކީ 2،300 ރުފިޔާ ކަމަށްވެސް އައިޔޫއެމް ވަނީ ބުނެފައެވެ.
