މޮޅަށްކުޅެ ރެއާލް ބެޓިސް 1-5 އިން ބަލިކޮށް މަޝްހޫރު ބާސެލޯނާ ކޮޕާ ޑެލްރޭ ކުއާޓާފައިނަލުގެ ޖާގައެއް ރޭ ކަށަވަރުކޮށްފިއެވެ.
ބާސެލޯނާގެ ދަނޑުގައި ކުޅުނު މިމެޗުގައި އެ ޓީމުން ލީޑް ނެގީ 3 ވަނަ މިނެޓުގައި މިޑްފީލްޑަރު ގަވީ ކާމިޔާބުކޮށްދިން ލަނޑަކުންނެވެ. ޑިފެންޑަރު ކުންޑޭގެ ލަނޑުން 27 ވަނަ މިނެޓުގައި ބާސެލޯނާއިން ލީޑް ފުޅާކުރިއެވެ. ފުރަތަމަ ހާފުގެ އިތުރު ވަގުތުގައިވެސް ކުންޑޭ ލަނޑެއް ޖެހިއެވެ. އެކަމަކު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. ބާސެލޯނާއިން ދެވަނަ ހާފުގައި ފަރަގު ބޮޑު ކުރީ މިސީޒަނުގައި މޮޅު ކުޅުމެއް ދައްކަމުން އަންނަ ރަފީނިއާ އާއި ލަމީން ޔަމާލް އަދި ފެރަން ޓޮރޭސްގެ ލަނޑުންނެވެ. ބެޓިސްއަށް ސުން ކަނޑުވާލަދިނީ ލިބުނު ޕެނަލްޓީއަކުން ބްރެޒިލްގެ ފޯވާޑް ވިކްޓަރ ރޯގެވެ. ރޯގަކީ ބާސެލޯނާއިން ލޯނު އުސޫލުން ބެޓިސްއަށް ދޫކޮށްފައިވާ ކުޅުންތެރިއެކެވެ.
ބާސެލޯނާއިން މިދިޔަ އާދިއްތަ ދުވަހުގެ ރޭ ސްޕެނިޝް ސްޕަރ ކަޕް ފައިނަލުގައި ވާދަވެރި ރެއާލްމެޑްރިޑް 5-1 އިން ބަލިކޮށް ޗެމްޕިއަންކަން ހޯދާފައިކަންވެސް ފާހަގަ ކޮށްލެވެއެވެ.
ބާސެލޯނާއަށް ކުރިއަށް 2 މެޗަކީ އަންނަ ހޮނިހިރު ދުވަހުގެ ރޭ ރާއްޖޭ ގަޑިން ދަންވަރު 1 ޖަހާއިރު ގެޓާފޭއާ ދެކޮޅަށް ކުޅެންޖެހޭ މެޗާއި މިމަހުގެ 22 ވަނަ ދުވަހުގެ ރޭ ޗެމްޕިއަންސް ލީގުގައި ބެންފީކާއާ ދެކޮޅަށް ކުޅެންޖެހޭ މެޗެވެ.
