ޖަސްޓިސް (ރިޓަޔަރޑް) އަލްއުސްތާޒު ޝުއައިބު ހުސައިން ޒަކަރިއްޔާ އަވަހާރަވުމަކީ، ދިވެހި ގައުމަށް، ހާއްސަކޮށް ރާއްޖޭގެ ޝަރުއީ ދާއިރާއަށް ލިބުނު ފުން ހިތާމައެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޝުޢައިބު ޒަކަރިއްޔާ އަވަހާރަވުމާއި ގުޅިގެން އެކްސްގައި ޕޯސްޓްކުރި ތައުޒިޔާގެ މެސެޖުގައެވެ.
ހައިކޯޓުގެ ކުރީގެ ފަނޑިޔާރު ޝުއައިބު ޒަކަރިއްޔާ އަވަހާރަވީ ރޭގެ ވަގުތެއްގައެވެ.
އެމަނިކުފާނު ވަނީ 23 އަހަރަށް ވުރެ ދިގު މުއްދަތަކަށް، ފަނޑިޔާރު ކަމުގައި ގައުމަށް މުހިއްމު ހިދުމަތްތަކެއް ކުރައްވާފައެވެ.
ރައީސް ވިދާޅުވީ، މަރުހޫމް ޝުއައިބު ހުސައިން ޒަކަރިއްޔާއަކީ ޝަރީއަތާއި ގާނޫނުގެ ދާއިރާއިން ދަރިވަރުން ބިނާކުރައްވައި ތަރުބިއްޔަތުކޮށްދެއްވި އެދުރެއްގެ ގޮތުގައި ހާއްސަ ހިދުމަތްތެރި އެއްކަމަށެވެ.
މީގެއިތުރުން ރައީސްގެ މެސެޖުގައި ވަނީ މަރުހޫމް ޝުއައިބު ހުސައިން ޒަކަރިއްޔާގެ އާއިލާއަށް ކެތްތެރިކަން މާތްﷲ މިންވަރު ކުރައްވާ، އަދި މަރުހޫމަށް ސުވަރުގޭގެ ދާއިމީ ނިއުމަތާއި ރަޙްމަތް މިންވަރު ކުރައްވުމަށް އެދިވަޑައިގެން ދުއާ ކުރައްވާފައެވެ.
