އައްޑޫ ސިޓީ ހިތަދޫގައި ކުށްމަދު އަމާން ވެއްޓެއް ގާއިމުކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން ރައްޔިތުންނާ ބައްދަލުކޮށް މައުލޫމާތުދިނުމުގެ ހަރަކާތެއް ކުރިއަށް ގެންގޮސްފިއެވެ.
ފުލުހުން ބުނީ މި މަހުގެ 16 ވަނަ ދުވަހު ކުރިއަށް ގެންދިޔަ މި ހަރަކާތުގައި ފުލުހުން ވަނީ މަގުމަތިންނާއި ހިތަދޫގެ އެކި ސަރަހައްދުތަކުގައި ރައްޔިތުންނާ ބައްދަލުކޮށް މުހިންމު ކަންކަމާ ގުޅޭގޮތުން ހިޔާލު ބަދަލުކޮށް، ހޭލުންތެރިކުރުމުގެ ގޮތުން މައުލޫމާތުދީފައި ވާ ކަމަށެވެ.
އެގޮތުން ކުށްތަކުން ރައްކާތެރިވެ ތިބުމަށް އަބަދުވެސް ސަމާލުކަންވީ ކަންކަމާއި، މީސް މީޑިއާގެ އެކި މަންސަތައް ބޭނުންކުރުމުގައި ސަމާލުކަން ދޭންވީ ކަންކަމާއި ވިޔަފާރިއާ ގުޅޭ މުއާމަލާތްތައް ކުރުމުގައި ސަމާލުކަންދޭންވީ ކަންކަމާ ގުޅޭގޮތުން މައުލޫމާތުދީފައިވާ ކަމަށްވެސް ފުލުހުން ބުންޏެވެ.
ފުލުހުން ބުނީ މި ހަރަކާތަށް އެރަށުގެ ރައްޔިތުންގެ ފަރާތުން ވަރަށް ބޮޑު އެއްބާރުލުމެއް ލިބިފައިވާ ކަމަށެވެ.
