ރާއްޖޭގައި މިހާރު ޕެޓްގެ ގޮތުގައި އެކިބަވަރުގެ ދޫނި ގެންގުޅެއެވެ. އޭގެތެރޭގައި "މިހަފްތާގެ ދޫނި " މި ބައިގައި މި ހިމަނާލަނީ ވަރަށް ގިނަ މީހުންގެ ޝައުގުވެރިކަމެއް ލިބިފައިވާ ދޫޏެއް ކަމަށްވާ "އެފްރިކަން ގްރޭ" އަށެވެ.
އެފްރިކަން ގްރޭ އަކީ ބުއްދިވެރި އަދި ވަރަށް އިޖުތިމާޢީ ދޫންޏެކެވެ. މިއީ ހުޅަނގު އަދި މެދުތެރޭ އެފްރިކާގެ ރެއިންފޮރެސްޓުތަކުގައި ދިރިއުޅޭ ދޫންޏެކެވެ.
ޚާއްޞަ ބުއްދި:
އެފްރިކަން ގްރޭ އަކީ ކޮގްނިޓިވް ޤާބިލުކަމުގެ ގޮތުން މަޝްހޫރު އަދި އިންސާނުންގެ ވާހަކައާއި އަޑުތައް ފާހަގަކޮށްލެވޭ ޞައްޙަކަމާއެކު ނަކަލުކުރެވޭ ދޫންޏެކެވެ. މި ސޮރު މައްސަލަ ހައްލުކުރުމާއި ވިސްނުމުގެ ގޮތުން ގިނަ ފަހަރަށް 5 އަހަރުގެ ކުއްޖަކާ އަޅާކިޔައެވެ.
މައިގަނޑު ވައްތަރުތައް:
އެފްރިކަން ގްރޭގައި މައިގަނދު ހިމެނެނީ 2 ވައްތަރެކެވެ.
ކޮންގޯ އެފްރިކަން ގްރޭ: މިއީ ބޮޑު، ފަނޑު އަޅި ކުލައިގެ ފިޔަތަކެއް ހުންނަ ގަދަ ރަތްކުލައިގެ ދޫންޏެކެވެ.
ޓިމްނޭ އެފްރިކަން ގްރޭ: މިއީ ކުދި، ގަދަ އަޅި ކުލައިގެ ފިޔަތަކެއް ހުންނަ، މެރޫން ކުލައިގެ ދޫންޏެކެވެ.
ކާނާ: މި ދޫނި ވަލުތެރޭގައި ކާނާ ހޯދަނީ މޭވާ، ނަޓްސް، އަދި ގަސްގަހާގެހިންނެވެ. އަޅުވެތިކަމުގައި ނުވަތަ މީހަކު އޮޅުކޮށްގެން ގެންގުޅޭއިރު، ބެލެންސްޑް ޑައިޓެއްގައި ޕެލެޓްސް، ތާޒާ މޭވާ، އަދި ތަރުކާރީ މި ދޫނީގެ މެނޫގައި ހިމެނެއެވެ. އެހެންކަމުން މި ދުނި ޕެޓްގެ ގޮތުގައި ގެންގުޅޭ ފަރާތްތަކުން މި ކަމަށް އިސްކަންދޭން ވާނެއެވެ.
އެފްރިކަން ގްރޭގެ އިޖްތިމާއީ ގުޅުން: މިއީ މި ސޮރުމެންގެ ވެރިންނާއި އެކު ވަރުގަދަ ގުޅުމެއް އުފެދި، ވެރިންނަށް ކިޔަމަންތެރިވާ ވަރަށް ލޯބިވާ ދޫންޏެކެވެ. ނަމަވެސް ފޫހިކަމާއި ސްޓްރެސް އިން ސަލާމަތްވުމަށްޓަކައި ނަފްސާނީ ގޮތުން ވަރަށް ބޮޑަށް އަޅާލައި، މުއާމަލާތް ކުރަން ޖެހެވެސް ދޫޏެކެވެ.
ދޫނީގެ ޢުމުރު:
އެކަށީގެންވާ ފަރުވާއެއް ދީގެން އަޅުވެތިކަމުގައި ނުވަތަ އޮޅުކޮށްގެން ގާތްގަނޑަކަށް 60 އަހަރު ދިރިއުޅެވެއެވެ. އަދި ވަލުތެރޭގައި އުޅޭ މިފަދަ ދޫނިތައް އާންމު ގޮތެއްގައި 40 އަހަރާއި 80 އަހަރާއި ދެމެދުގެ މުއްދަތަކަށް އުޅޭކަމަށް ދިރާސާތަކުން ދައްކައެވެ.
މި ހުރިހާ ކަމަކާއެކު، އެފްރިކަން ގްރޭއަކީ ގިނަ ދިވެހީންގެ ހިތުގައި ޚާއްސަ ލޯތްބެއް ދެވިފައިވާ ދޫންޏެކެވެ. މި ދޫނި ޕެޓެއްގެ ގޮތުގައި ގެންގުޅުމަކީވެސް ގިނަ ބައެއްގެ ހުވަފެނެކެވެ. އެހެންކަމުން މި ލިޔުމުން މި ދޫނި ގެންގުޅުމަށް ބޭނުންވާ ފަރާތްތަކަށް މަޢުލޫމާތުކޮޅެއް ލިބިގެންދާނެކަމަށް އުންމީދު ކުރަމެވެ.
https://sarukaaru.gov.mv/articles/6733
