އިޒްރޭލުގެ މުހައްލިލުން ދަނީ މީޑިއާގައި އެކަކުއަނެކަކަށް ހޫނު ބަހުސްތައް ކޮށް ޒުވާބު ކުރަމުންނެވެ. ގާތްގަނޑަކަށް އެންމެން އިއްތިފާގު ވަނީ ޣައްޒާގައި 15 މަސް ވަންދެން ހިންގި ހަނގުރާމައަކީ ބޭކާރު ހަނގުރާމައެއް ކަމަށެވެ.
އެއް ބަޔަކު ބުނަނީ 2005ގައި ޝެރޯންގެ ސަރުކާރުން ނަތަންޔާހޫ އިސްތިއުފާ ދިނީ، ޣައްޒާއިން ސިފައިން ބާލާތީއެވެ. މިއަދު ނަތަންޔާހޫ ވަނީ ޣައްޒާއިން ސިފައިން ބާލާފައެވެ. އަދި މަޝްވަރާއަށް ނީށީންނާނެ ކަމަށާއި ނައްތާލަން ބުނި ހަމާސްއާއެކު މަޝްވަރާކޮށް ނަތަންޔާހޫ ސަރުކާރުން ވަނީ އެއްބަސްވުމެއްގައި ސޮއިކޮށްފައެވެ. އަދި ހަމާސް ފެނިގެން ދަނީ ކުރިއަށް ވުރެން ވަރުގަދަވެފައިވާ ތަނެވެ.
މުހައްލިލުން ހައިރާން ވެގެން އެތައް ކަމެއް ފާހަގަކޮށް، އިޒްރޭލު ކުށްވެރި ކުރަމުން، އެތައް ސުއާލެއް ކުރެއެވެ.
އަސީރުން ނެރުނީ ކޮންތާކުން؟
އެމީހުން ބުނަނީ އުތުރު ޣައްޒާގައި އެތައް ފަހަރު ބޮންއަޅައި ނެޓްސާރީމް ޗެކްޕޯސްޓް ކައިރީގައި ސިފައިން ދާއިމަށް ތިބި އިރު، އަދި ބައިތު ހަނޫން އެއްކޮށް ބިމާކޮށްފައިވާ އިރު، ޙަމާސްއިން އަސީރުން ގެންގުޅުނުތަން ޔަހޫދު ސިފައިންނަށް ނު ހޯދުނީ ކީއްވެގެން ހެއްޔެވެ؟
ކޮންތާކުން ހޯދި ޕިކަޕްތަކެއް؟
އަދި އެމީހުން ބުނަނީ ހަމާސްއިން ބޭނުން ކުރި ޕިކަޕްތައް ހީވަނީ ދެންމެ ފެކްޓްރީން ޑެލިވާކޮށްފައި ހުރި، ކޫރުމެއް ނެތް، އައު ޕިކަޕްތަކެއް ހެންނެވެ. އެ ޕިކަޕްތައް ސިފައިންނަށް ފެނިފައި ނުވަނީ ކީއްވެގެން ހެއްޔެވެ؟ ބަހައްޓައިގެން އުޅުނީ ކޮންތާކު ހެއްޔެވެ؟
އައު ޔުނިފޯމުތަކެއް؟
އޭގެ އިތުރުން ޙަމާސް މީޙުންގެ ޔުނިފޯމްތަކާ ބެހޭ ގޮތުން ބުނަނީ، ހީވަނީ އެއީ ދެންމެ ލޯންޑްރީން ނެރެގެން ގެނަސް ލައިގެން އުޅޭ އައު ޔުނިފޯމްތަކެއް ހެންނެވެ. އެ ޔުނިފޯމްތައް ހޯދީ ކޮންތާކުން ހެއްޔެވެ؟
ފުރިހަމަ އިދާރީ މަސައްކަތެއް
ހަމާސްގެ އިދާރީ މަސައްކަތަށްވެސް ބަޔަކު ތައުރީފު ކުރެއެވެ. އެގޮތުން އަސީރުން ހަވާލު ކުރުމަށް ފުރިހަމަ އިދާރީ އިންތިޒާމުތައް ހަމަޖެއްސުމާއި ރެޑްކްރޮސްއާ ހަވާލު ކުރި އިރު ފޯމުތަކުގައި ސޮއިކުރުވުމުގެ މާނަކީ ޙަމާސްގެ އިދާރީ މެނޭޖުމެންޓުގެ ކުޅަދާނަކަން ކަމަށް، ޔަހޫދީ މުހައްލިލުން ބުނެއެވެ.
ކޮތަޅު ޕްރިންޓް ކުރީ ކޮންތާކުން؟
އަދި ހަނގުރާމައެއް ހިނގައި މުޅި ތަން ސުންނާފަތި ކޮށްފައިވާއިރު، ހަދިޔާއަކަށް ދިން ކަރުދާހު ކޮތަޅާއި އެ ކޮތަޅު ޕްރިންޓު ކުރުމާއި ފޯމުތައް ޕްރިންޓު ކުރުމަކީވެސް އެމީހުން ބުނަނީ އެއީކީ އާދައިގެ ކަންކަމެއް ނޫން ކަމަށެވެ.
ހަމާސް މިއީ އަރަތެއް!
އަދި ހަމާސްގެ ވަށައިގެން ސާފު ނުވާ، ގޮތް ނޭނގޭ ކިތަންމެ ކަމެއް ހުރިކަމަށްވެސް ބުނެއެވެ.
އެއްބަޔަކު އިޒްރޭލު ސަރުކާރަށް ޖޯކު ޖަހަމުން ބުނެފައި ވަނީ، ހަނގުރާމަ ހުއްޓަލުމަށްފަހު ޖެހިގެން އަންނަ ދުވަހު ޣައްޒާ ހިންގުމަށް އައު ނިޒާމެއް ގާއިމް ކުޜާނެކަމަށް އިޒްރޭލު ސަރުކާރުން ބުނާ އިރު "ޖެހިގެން އަންނަ ދުވަހަކީ ޙަމާސް" ކަމަށް މިހާރު ބެލެވޭ ކަމަށެވެ!
