ހުވައި ކުރެއްވި އިރު އިންޖީލުގައި އަތް ބިއްސާލައްވަން ޓްރަމްޕް ބޭނުންފުޅެއް ނުވިއެވެ! ނުތާހިރު ހާލަތެއްގައި ހުންނެވީ ބާވައެވެ! ޢިލްމުވެރިން ވިދާޅުވަނީ، ކާފަރުންގެ ތާހިރުކަމާއި މުޤައްދަސް ފޮތުގައި އަތް ލުމަކާ ގުޅުމެއް ނުވާ ކަމަށެވެ. އެހެންވެސް، "އިންޖީލު ބޮޑި ހިތްޕަވައިގެން ހުންނެވި ޓްރަމްޕްގެ އަނބިކަނލުންގެ ޖުނުބާއި ޙައިޟުގެ ހާލަތް އެނގެނީވެސް ކާކަށްތޯ" މި މައުޟޫގައި ވާހަކަ ދެއްކެވި އެއް ބޭކަލަކު ވިދާޅުވިއެވެ.
ޓްރަމްޕް އިންޖީލުގައި އަތްޕުޅު ބިއްސަވާން ބޭނުންފުޅު ނުވި މައްސަލާގައި، އެމެރިކާގެ ޤާނޫނީ މާހިރުންވެސް މި ޚިޔާލާ އެއްގޮތަށް ވާހަކަ ދައްކަވައެވެ.
އެބޭފުޅުން ވިދާޅުވަނީ ހުވައިކުރުމާއި، އިންޖީލުގައި ނުވަތަ އެހެންވެސް މާތް ފޮތެއް ހިފައިގެން ނުވަތަ ބީހިގެން ހުވައި ކުރުމަކީ އެމެރިކާގެ ގާނޫނު ދަންނަ މަފްހޫމެއް ނޫން ކަމަށެވެ.
އެމެރިކާގެ ދުސްތޫރު ލިޔުނު މީހުން އެ ޑޮކިއުމެންޓް ލިޔެފައިވަނީ ދީން ގަބޫލު ނުކުރާ، ފުރައްދެ ކާފަރަކުވެސް އެމެރިކާގެ ވެރިކަމަށް އައިސްފާނެ ކަމަށް ބަލައިގެން އެކަމަށްވެސް ފުރުސަތު ދޭ ގޮތަށް ކަމަށް، ޔުނިވާސިޓީ އޮފް ޓެކްސަސް އެޓް އޮސްޓިންގެ ތާރީޚު ޢިލްމުގެ ޕްރޮފެސަރު އަދި ރިޔާސީ ކަންކަމާ ބެހޭ އިލްމުވެރިޔާ ޖެރެމީ ސީރީ ވިދާޅުވެއެވެ.
އޭނާ ވިދާޅުވަނީ، އެމެރިކާގެ ރައީސުލްޖުމްހޫރިއްޔާ ކަމުގެ މަގާމާ ހަވާލުވުމާއި އިލާހީ ޒާތުފުޅު ހެކިކޮށް ހުވައި ކުރުމަށް ބުނާ އެއްވެސް ގާނޫނީ ނައްސެއް އެއްވެސް ތާކު ބަޔާންކޮށްފައި ނުވާނެ ކަމަށެވެ. އޭނާ ވިދާޅުވަނީ އެމެރިކާގައި ކުރާ ހުވައަކީ ގާނޫނުއަސާސީއަށް ކުރާ ހުވައެއް ކަމަށެވެ.
"އަޅުގަނޑަކަށް ހިއެއް ނުވޭ މިކަމުގެ ސަބަބުން ޓްރަމްޕް މަނިކުފާނު ކުރެއްވި ހުވައަށް އެއްވެސް އަސަރެއް ކުރާނެ ހެނެއް،" ސީރީ ވިދާޅުވެއެވެ.
