މަސްވެރި އިހަވަންދޫއަށް ވަޑައިގެން އެރަށުގައި ޤާއިމު ކުރެއްވުމަށް ރައީސް ޑޮކްޓަރ މުހައްމަދު މުއިއްޒު އިއުލާނު ކުރެއްވި ކަންކަމާއި، ބިންގާ އަޅުއްވައި ދެއްވި ކަންކަމާއެކު އިހަވަންދޫ ރައްޔިތުންނަށް އުފާވެރިކަމުގެ އީދަކަށް މިއަދު ހަވީރު ވެގެން ހިނގައްޖެއެވެ.
ރައީސް ޑޮކްޓަރ މުއިއްޒު މިއަދު ހަވިރު އިހަވަންދޫއަށް ވަޑައިގަތުމާއެކު އެރަށުން ވަރަށް ހޫނު މަރުހަބާއެއް ދެންނެވިއެވެ.
އިހަވަންދޫގައި ރައީސް ޑޮކްޓަރ މުއިއްޒު ވަނީ ދިވެހި ރައްޔިތެއްކަން އަންގައިދޭ ކާޑު ޕްރިންޓްކޮށް ދޫކުރުމާއި، ޕާސްޕޯޓު ދޫކުރުމުގެ ޚިދުމަތް ފައްޓަވާ ދެއްވާފައެވެ.
މީގެ އިތުރުން އިހަވަންދޫގައި 123 މިލިޔަން ރުފިޔާ ހަރަދު ކުރައްވައިގެން 30 އެނދުގެ ހޮސްޕިޓަލެއް އެޅުމަށް މިއަދު އާރުޑީސީއާ ހަވާލުކޮށް އެގްރިމެންޓުގައި ސޮއި ކުރުންވެސް އޮތެވެ. އިހަވަންދޫގައި އެކަށީގެންވާ ފެންވަރުގެ ހޮސްޕިޓަލެއް އެޅުމަކީ ރިޔާސީ އިންތިޚާބުގެ ދުވަސްވަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށްވީ ވަޢުދުތަކުގެ ތެރެގައި ހިމެނޭ ވައުދެކެވެ. ނިމިދިޔަ އެމްޑީޕީ ސަރުކާރުންވެސް އިހަވަންދޫގައި ހޮސްޕިޓަލެއް އެޅުމަށް ބަޔަކާ އެގްރިމެންޓު ކުރިއެވެ.
އިހަވަންދޫ ރައްޔިތުންނާ ބައްދަލު ކުރައްވައި ރައީސް ދެއްކެވި ވާހަކަފުޅުގައި ކުރިއަށް އޮތް ރަމަޟާންމަސް ފެށުމުގެ ކުރިން ރަށުގައި ތިބިގެން ޑަޔަލިސިސް ހެދޭނެ މަގުފަހިކޮށްދެއްވާނެކަމަށް ރައީސް ވިދާޅުވިއެވެ. މީގެ އިތުރުން އިހަވަންދޫގައި 200 ހައުސިންގ ޔުނިޓް، އޭޓީއެމްގެ ހިދުމަތް، މަގު ހެދުމުގެ ދެވަނަ މަޝްރޫއަކާއި އިހަވަންދޫ ބަނދަރުގައި ނުނިމި ހުރި މަސައްކަތް ފުރިހަމަ ކޮށްދެއްވާނެ ކަމުގެ ޔަގީންކަން އިހަވަންދޫ ރައްޔިތުންނަށް ރައީސް ޑޮކްޓަރ މުއިއްޒު މިއަދު ދެއްވިއެވެ.
އިހަަވަންދޫއަށްފަހު ރައީސް މިއަދު ހަވީރު ވަޑައިގަތީ ހއ.ގެ ވެރިރަށް ހޯރަފުއްޓަށެވެ. ރައީސް މިރޭ މަޑުކުރައްވާނީ ހޯރަފުށީގައެވެ.
