އަސީރުން ބަދަލު ކުރުމުގެ އެއްބަސްވުމުގެ ދަށުން، ފަަލަސްތީނުގެ މިނިވަންކަމަށްޓަކައި ޖިހާދުކުރާ ހަމާސް ޖަމާއަތުން މިއަދު އިޒްރޭލުގެ އަންހެން އޮފިސަރަކު ދޫކޮށްލައިފިއެވެ.
ވަރަށް ވަރުގަދަ ސަލާމަތީ ފިޔަވަޅުތަކާއެކު ހަމާސް ޖަމާއަތުން، ޒަޔަނިސްޓް އަންހެން ސިފައިންގެ މީހާ ހަވާލު ކުރީ ރެޑްކްރޮސްއާއެވެ. ޒަޔަނިސްޓް ސިފައިންގެ އަންހެން މީހާ ދޫކޮށްލުމުގެ ކަންކަން ޣައްޒާގެ ޚާންޔޫނިސްގައެވެ. މަންޒަރުބަލަން އެތައް ސަތޭކަ ބަޔަކު އެއްވެތިއްބެއެވެ. ދުނިޔޭގެ މަޝްހޫރު ޓީވީ ޗެނެލްތަކުންވެސް މިމަންޒަރު ދިޔައީ ވަގުތުން ދުރަށްދައްކަމުންނެވެ.
އަސީރުން ބަދަލު ކުރުމުގެ އެއްބަސްވުމުގެ ދަށުން ހަމާސް ޖަމާއަތުން މިއަދު ވަނީ އިޒްރޭލުގެ 11 މީހުން ދޫކޮށްލާފައެވެ. މީގެ ބަދަލެއް ގޮތުގައި ފަލަސްތީނުގެ 110 މީހުން އިޒްރޭލުން ދޫކޮށްލަން ޖެހެއެވެ. އިޒްރޭލުގެ ޖަލުތަކުގައި ފަަލަސްތީނުގެ އެތަސްހާސް ބަޔަކު ޒަޔަނިސްޓް އިޒްރޭލުން ވަނީ ހައްޔަރުކޮށްފައެވެ.
2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހު ހަމާސް ޖަމާއަތުން އިޒްރޭލުގެ ދިފާއު ފޫއަޅުވާލާ 200 އެއްހައި އަސީރުން ޣައްޒާއަށް ގެނައެވެ. ހަމާސްޖަމާއަތުގެ މަޤްސަދަކަށް ވެފައި އޮތީ އިޒްރޭލުގެ ޖަލުތަކުގައި ހައްޔަރުކޮށްފައި ތިބި އެތައް ސަތޭކަ ފަަލަސްތީނު ރައްޔިތުން ދޫކޮށްލުމަށް އިޒްރޭލަށް މަޖުބޫރު ކުރުމެވެ. މިކަމުގެ ބަދަލު ހިފުމުގެ ގޮތުން އިޒްރޭލުން ޖެހިގެން އައި ދުވަހު ފަލަސްތީނާ ދެކޮޅަށް ލާއިންސާނީ ހަނގުރާމައެއް ފަށައި މުޅި ޣައްޒާ ސުންނާފަތިކޮށް، ބައިލައްކައެއްހައި މީހުން ޝަހީދު ކުރިއެވެ.
ހަމާސް ޖަމާއަތުގެ ތަރުޖަމާނު އަބޫ އުބައިދާ 2023 ޑިސެމްބަރު 15 ވަނަ ދުވަހު ބުނެފައި ވަނީ، ސަހްޔޫނީ ސިފައިން ކިތަންމެ ގިނަ ދުވަހު ހަނގުރާމަކުރިނަމަވެސް، ހަމާސް ޖަމާއަތުން ދޫކޮށްލުމުން ނޫން ގޮތަކަށް، އެޖަމާއަތުގެ އަތްދަށުގައިވާ އެއްވެސް މީހަކު ސަޔްހޫނީ ބާރުތަކަށް މިނިވަން ނުކުރެވޭނެ ކަމަށެވެ. މިނެތް ނެތްވަރަށް އެމެރިކާ އާއި ހުޅަނގުން ހަތިޔާރު ފޯރުކޮށްދިނަސް ފަަލަސްތީނު ރައްޔިތުންގެ ހިތްވަރާއި އަޒުމް އަދި ހަމާސްޖަމާއަތް އިޒްރޭލަށް ބަލި ނުކުރެވޭނެކަން މިއަދު މިވަނީ މުޅި ދުނިޔެއަށް ފެނިގެން ގޮސްފައެވެ.
