އެމެރިކާގެ ރައީސް ޑޮނަލްޑް ޓްރަމްޕް ވަނީ ގަވާއިދާ ޚިލާފަށް އެމެރިކާއަށް ވަދެފައިވާ މީހުން، އަނިޔާ ކުރުމާއި އިންސާނީ ހައްގު ނިގުޅައި ގަތުމަށް މަޝްހޫރު ގުއަންޓަނާމޯ ޖަލުގައި ބަންދު ކުރުމަށް ނިންމާފައެވެ.
އެމެރިކާގެ ދިފާޢީ ވަޒީރު ޕީޓް ހިގްސިތު ވިދާޅުވެފައިވަނީ ކިއުބާގައި ހުންނަ ގުއަންޓަނާމޯ ޖަލާއި އަސްކަރީ މަރުކަޒަކީ އެމެރިކާއިން ބޭރުކޮށްލާ މީހުން ބޭތިއްބުމަށް "އެންމެ އެކަށީގެންވާ މަރުކަޒު" ކަމަށެވެ.
މިއީ ޑޮނަލްޑް ޓްރަމްޕް ބޭރުކޮށްލަން ބޭނުންވާ "ކުށްވެރި ބިދޭސީން" ގެ ތެރެއިން 35،000 މީހުންނަށް ޖާގަ ހެދޭނެފަދަ ތަނެއް ކަމަށް އޭނާ ބުނެއެވެ. އަދި ބޭނުންނަމަ އެ އަދަދު 75 ހާހަށް އިތުރު ކުރެވިދާނެ ކަމަށްވެސް ބުނެއެވެ.
އެމެރިކާއަކީ އެންމެ ގިނަ މީހުން ޖަލުގައި ގެންގުޅޭ ގައުމެވެ.
ޓްރަމްޕް ވެރިކަމަށް އައިފަހުން އެކި ތަންތާނގައި އިންސާނީ ހައްގު ނިގުޅައިގަތުމަށް ސިލްސިލާ ވާހަކަތަކެއް އޭނާ ދައްކަމުން ދެއެވެ. އެއް ފަހަރު ޣައްޒާއިން މީހުން ބޭރުކުރުމަށްވެސް ވާހަކަ ދައްކާފައި ވެއެވެ. އެފަދައިން އޭނާ ވަނީ އމެރިކާގައި އުޅޭ މުހާޖިރުންނާ ދެކޮޅަށް ހަރުކަށި ފިޔަވަޅު އެޅުމަށްވެސް ހުށަހަޅާފައެވެ.
ޓްރަމްޕް އޭނާގެ ޕްލޭން ތަންފީޒުކުރާނެ ގޮތުގެ ތަފްޞީލު ހާމަކޮށްފައެއް ނުވެއެވެ. ނަމަވެސް އޭނާ ވަނީ ދިފާޢީ ވުޒަރާއަށާއި ޑިޕާޓްމަންޓް އޮފް ހޯމްލޭންޑް ސެކިއުރިޓީއަށް ނަން ހުތުރު ގުއަންޓަނާމޯގެ ޖަލުގައި މީޙުން ބަންދުކޮށްފައި ބޭތިއްބުމަށް ބޭނުންކުރާ މަރުކަޒެއްގެ ގޮތުގައި ތައްޔާރުކުރުމަށް އަންގަވާފައެވެ.
މިހާރުވެސް އެމެރިކާއިން ވަގަށް ނަގާފައިވާ އެތައް މުސްލިމުންނެއް ޝަރީއަތަކާ ނުލައި ގުއަންޓަނާމޯގައި އެމެރިކާއިން ގެންގުޅެއެވެ.
