ޤައްސާމް ބްރިގޭޑްގެ ލީޑަރު މުޙައްމަދު ޟައިފް ޝަހީދު ވެފައިވާ ކަމަށް ޙަމާސްގެ ތަރުޖުމާން އަބޫޢުބައިދާ ޔަގީން ކޮށްދީފިއެވެ. އަދި ޟައިފްއާއެކު އޭނާގެ ނާއިބް މަރުވާން ޢީސާވެސް ޝަހީދު ވެފައިވާ ކަމަށް އަބޫ ޢުބައިދާ ބުންޏެވެ.
މުޙައްމަދު ޟައިފް ޝަހީދުވީ ޣައްޒާ ހަނގުރާމައިގެ ތެރޭގައެވެ. ނަމަވެސް ކޮން މަހެއްގައި ކަން އޭނާ ބުނެއެއް ނުދެއެވެ.
ޟައިފަކީ އިޒްރޭލާ ދެކޮޅަށް ޤައްސާމުން ދޭ ވަރުގަދަ ހަމަލަތަކާ ހެދި އިޒްރޭލުން އެންމެ ބޮޑަށް ހޯދަމުން ދިޔަ ހަމާސްގެ ލީޑަރުންގެ ތެރެއިން އެކެކެވެ.
ޣައްޒާގައި ހިނގި ހަނގުރާމައިގެ ކުރިން އޭނާގެ އާއިލާގެ މެމްބަރުންނާއި ހަމާސްގެ ކުޑަ ޖަމާއަތެއް ފިޔަވައި މުޙައްމަދު ޟައިފް ދަންނަ ބަޔަކު ނެތެވެ. އަދި އެ މަދު އާއިލާއާއި ރައްޓެހިންގެ ތެރޭންވެސް ގިނަ ބަޔަކަށް އޭނާ އުޅޭ ތަނެއް ނޭނގެއެވެ.
އޭނާއާ ބެހޭ ގޮތުން އިޒްރޭލަށް ލިބިފައި ވަނީ 4 ފޮޓޯއެކެވެ. އޭނާގެ ކުޑަ އިރުގެ ފޮޓޯއަކާ އޭނާގެ ހިޔަންޏެއްގެ ފޮޓޯއަކާއި ބަޔަކާއެކު އޭނާ ފެންނަ ފޮޓޯއަކާއި ފަހުން އޭނާގެ އެއް ލޯ ގޮވާފައި ވަނިކޮށް ނަގާފައިވާ ފޮޓޯއެކެވެ. މި 4 ވަނަ ފޮޓޯ 2023 ވަނަ އަހަރު ނިމުނުއިރު އިޒްރޭލުން އާންމުކުރިއެވެ.
އިޒްރޭލުން މުޙައްމަދު ޟައިފް ހޯދަން ފެށީ 1990 ގެ އަހަރުތަކުގެ މެދުތެރެއިން ފެށިގެންނެވެ. 1996 ވަނަ އަހަރު އިސްރާއީލުގެ ބޮޑުވަޒީރުކަން ކުރި ޝިމޯން ޕެރޭޒް ފަލަސްތީނުގެ ރައީސް ޔާސިރު އަރަފާތު ގާތު، ޟައިފް ހައްޔަރުކޮށްދޭން އެދުނެވެ. އަރަފާތުގެ މޫނުމަތިން ޟައިފަކީ ކާކުކަން އަރަފާތަށް އެނގުނު ކަމަކަށް ނުވިއެވެ. ނަމަވެސް ފަހުން ޕެރޭޒް ބުނެފައި ވަނީ ޢަރަފާތު އޭނާ ފޮރުވައގެން ގެންގުޅު ކަމަށް ޝައްކު ކުރެވުނު ކަމަށެވެ. އަރަފާތު ވަނީ އެކަމަށް އިންކާރު ކުރައްވާފައެވެ.
ޟައިފް އަވަހާކޮށްލަން އިޒްރޭލުން ދިން ހަމަލަތައް ނާކާމިޔާބު ވިއެވެ. ނަމަވެސް ޟައިފް އިޒްރޭލާ ދެކޮޅަށް އެތައް ކާމިޔާބު ހަމަލަތަކެއް ދީ، ޤައްސާމު ބްރިގޭޑް ބިނާ ކުރެއްވިއެވެ.
އަބޫ އުބައިދާ ބުނަނީ އެއް ލީޑަރަކު ޝަހީދު ވެއްޖެނަމަ އެތައް ހާސް ލީޑަރުން އުފެދޭނެ ކަމަށެވެ، އެއީ ފަލަސްޠީނު ކަމަށެވެ.
