ސްޓެލްކޯ އިން މިއަދު ހާމަކުރި ގޮތުގައި، ކުންފުނީގެ މެނޭޖިންގ ޑިރެކްޓަރ ހުސައިން ފަހުމީ އާއި ކުންފުނީގެ އިސް ވެރިންގެ ޓީމެއް ވަނީ މިއަހަރުގެ ޕީކް ހޭންޑްލިންގ އަށާއި ގްރޭޓަރ މާލޭގެ ޕަވަރ ސެކިއުރިޓީގެ ބެކަޕްގެ ގޮތުގައި ގެނެސްފައިވާ ޖަނަރޭޓަރު ސެޓްތައް ބަހައްޓާނެ ބިން ބައްލަވާލައްވާފައެވެ.
މި ދަތުރުގައި އެމް.ޑީ އާއި އެކު ދިޔަ ޓީމުން ވަނީ ޖަނަރޭޓަރު ސެޓްތައް ބެހެއްޓުމަށް ހަމަޖެހިފައިވާ ބިމުގައި ކުރެވެމުންދާ ސާފުކުރުމުގެ މަސައްކަތްތައް ބައްލަވާލައްވާފައެވެ. މި މަސައްކަތްތަކަކީ އަލަށް ގެނެވުނު ޖަނަރޭޓަރު ސެޓްތައް ބެހެއްޓުމަށް ތައްޔާރުވުމުގެ ގޮތުން ކުރެވޭ މަސައްކަތްތަކެކެވެ.
ސްޓެލްކޯގެ ފަރާތުން މަޢުލޫމާތު ދެއްވި ގޮތުގައި، މި ޖަނަރޭޓަރު ސެޓްތަކަކީ ރާއްޖޭގެ ވެރިރަށް މާލެ އާއި ހުޅުމާލެ އަދި ވިލިމާލެ ހިމެނޭ ގްރޭޓަރ މާލޭ ސަރަހައްދުގެ ކަރަންޓުގެ ޚިދުމަތް އިތުރަށް ހަރުދަނާކޮށް، ޚާއްޞަކޮށް ޕީކް ގަޑިތަކުގައި ކަރަންޓުގެ ޑިމާންޑް އިތުރުވާ ދަނޑިވަޅުތަކުގައި ބޭނުންކުރުމަށް ގެނެވިފައިވާ ޖަނަރޭޓަރު ސެޓްތަކެކެވެ.
މީގެ އިތުރުން، މި ޖަނަރޭޓަރު ސެޓްތަކަކީ ކުއްލި ހާލަތެއްގައި ޕަވަރ ސިސްޓަމަށް މައްސަލައެއް ދިމާވެއްޖެނަމަ، ބެކަޕްގެ ގޮތުގައި ބޭނުންކުރެވޭނެ ވަސީލަތްތަކެއް ކަމުގައިވެސް ސްޓެލްކޯއިން ފާހަގަކުރެއްވިއެވެ. މިކަމުގެ ސަބަބުން ގްރޭޓަރ މާލޭ ސަރަހައްދުގެ ކަރަންޓުގެ ޚިދުމަތް އިތުރަށް ރައްކާތެރިކަމާއެކު ފޯރުކޮށްދެވޭނެ ކަމަށް ކުންފުނިން އުންމީދުކުރެއެވެ.
