މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ އެސިސްޓެންޓް ޕްރޮފެސަރ ޑރ. މުހައްމަދު އިޔާޒްގެ ސަސްޕެންޝަން އުވާލައިފި އެވެ.
މި މަހުގެ ފަސް ވަނަ ދުވަހު 14 ދުވަހުގެ މުއްދަތަށް ޑރ. އިޔާޒް ސަސްޕެންޑު ކުރީ އޭނާ ކުރައްވާ ޓްވީޓްތަކުގެ ސަބަބުން ޔުނިވާސިޓީގެ އަބުރާއި އިއްޒަތާއި ގަދަރަށް ހީނަރުކަން އަންނަކަމަށް ބުނެ އެވެ.
އެމްއެންޔޫއިން މިއަދު ވަނީ ސަސްޕެންޝަން އުވާލިކަން އޭނާ އަށް އަންގާފަ އެވެ.
ޑރ. އިޔާޒް ވިދާޅުވާ ގޮތުގައި އެއީ ސިޔާސީގޮތުން އޭނާއާ ޖައްސާލައިގެން އުޅޭ ބޭފުޅަކު އަޑީގައި ހުންނަވައިގެން ކުރި ކަމެކެވެ. ގާނޫނާ ގަވާއިދާ ޚިލާފު އެއްވެސް ވާހަކައެއް ޓްވީޓް ކުރައްވާފައިނުވާނެ ކަމުގެ ޔަގީންކަން އޭނާ ވަނީ ރައްޔިތުންނަށް ދެއްވާފަ އެވެ.
ޑރ. އިޔާޒް ސަސްޕެންޑު ކުރީ ބަލަމުން އަންނަ މައްސަލައަކާ ގުޅިގެން ކަމަށް އެމްއެންޔޫއިން އޭނާ އަށް އަންގާފައިވެ އެވެ. ނަމަވެސް މިހާރު އެ މައްސަލައިގެ ތަހުގީގު ގޮސްފައިވާ ހިސާބެއް އެމްއެންޔޫއިން ބުނެފައެއް ނުވެ އެވެ.
