ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަކީ މިންތީގެ ހަމަހަމަކަން ޤާއިމްކުރެވިފައިވާ، އަންހެނުންނަށް ފިރިހެނުންނާ އެއްހަމައެއްގައި މަސައްކަތްކުރުމުގެ ފުރުސަތު ލިބިދޭ ކުންފުންޏެއްކަމަށް އެ ކުންފުނީގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެއްޖެއެވެ.
އަންހެނުންގެ ދުވަހާ ގުޅިގެން ސްޓެލްކޯގައި ބޭއްވުނު ޚާއްސަ ހަފްލާއެއްގައި ވާހަކަފުޅު ދައްކަވަމުން އެމްޑީ ފަހުމީ ވިދާޅުވީ، ސްޓެލްކޯއަކީ އެކި ދާއިރާތަކުން އަންހެނުން ބާރުވެރިކުރުވުމުގައި ނަމޫނާ ކުންފުންޏެއް ކަމަށެވެ.
"އަޅުގަނޑުމެންގެ ކުންފުނީގައި އަންހެން މުވައްޒަފުންނަށް ވަރަށް މުހިންމު ދައުރެއް އަދާކުރެވޭ. ހުރިހާ ފަންތިއެއްގައި ވެސް އަންހެނުން މަސައްކަތްކުރޭ. އިންޖިނިއަރުންގެ ގޮތުގައި، މެނޭޖަރުންގެ ގޮތުގައި، އަދި ޓެކްނީޝަނުންގެ ގޮތުގައި ވެސް އަންހެނުން މަސައްކަތްކުރޭ،" އެމްޑީ ފަހުމީ ވިދާޅުވިއެވެ.
މި ހަފްލާގައި ސްޓެލްކޯގެ އަންހެން މުވައްޒަފުންގެ އަގު ވަޒަންކޮށް، އެ ކަނބަލުންގެ ހީވާގިކަމާއި ޤާބިލުކަން ފާހަގަކުރެވުނެވެ. އަދި ކުންފުނީގެ ކުރިއެރުމަށް އަންހެން މުވައްޒަފުން ކޮށްފައިވާ މަސައްކަތްތައް ވެސް ފާހަގަކުރެވުނެވެ.
ސްޓެލްކޯއިން ބުނީ، ކުރިއަށް އޮތް ތަނުގައި ވެސް އަންހެނުންނަށް ހަމަހަމަ ފުރުސަތުތައް ދިނުމަށާއި، އެ ކަނބަލުން އިތުރަށް ބާރުވެރިކުރުވުމަށް މަސައްކަތްކުރާނެ ކަމަށެވެ.
