އައްޑޫ ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި އަނިޔާވި އަންހެން މީހާ ނިޔާވެއްޖެއެވެ.
ސ. ހިތަދޫ، ސަންރީފު، ފާޠިމަތު އަސްމާ ނިޔާވީ އެކްސިޑެންޓަށްފަހު އޭއީއެޗުގައި ފަރުވާ ދެމުންދަނިކޮށެވެ. އޭނާއަށް ފަރުވާ ދެމުން ގެންދިޔައީ ވެންޓިލޭޓަރުގައެވެ.
އަސްމާ އެކްސިޑެންޓުވެފައިވަނީ އޭނާގެ ދަރިފުޅު އައްޑޫ ހައި ސްކޫލަށް ގެންދިއުމަށްފަހު އެނބުރި އޭނާ ދިރިއުޅެމުން އަންނަ މަރަދޫފޭދޫއަށް ދިޔަ މަގުމަތީގައެވެ.
މި އެކްސިޑެންޓުގައި އަސްމާގެ ބޮލަށް ސީރިއަސް އަނިޔާތަކެއް ލިބިފައިވެއެވެ. އަދި މޭކަށިގަނޑު ބިންދައިގެން ގޮސް ވާއަތު ކޮޑު ކަށިގަނޑުވެސް ބިދިފައިވާ ކަމަށް އޭއީއެޗުން ބުނެފައިވެއެވެ.
އަސްމާ އެކްސިޑެންޓްވި ސަބަބު އަދި ސާފުވެފައެއް ނުވެއެވެ. މި މައްސަލަ ހިތަދޫ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.
