ނ.ޅޮހިން އިތުރު ހަތަރު މީހަކު މިއަދު ކޮވިޑް-19 އަށް ޕޮޒިޓިވް ވެއްޖެއެވެ.
ޅޮހިން ފުރަތަމަ ޕޮޒިޓިވް ވެފައިވަނީ ކަރަންޓީނުގައި ތިބި ބައެކެވެ. ކަރަންޓީންގައި ތިބިއިރު އެމީހުންނާ ބައްދަލުވި ބައެއް މީހުންގެ ސާމްޕަލްތައް މިހާރު އަންނަނީ ނަގަމުނެވެ.
އެޗްއީއޯސީގެ ތަރުޖަމާނު ޑރ.ނަޒްލާ ރަފީގު ވިދާޅުވީ ކޮންޓެކްޓުންގެ ސާމްޕަލްތައް ނަގައި ޓެސްޓު ކުރުމުގެ ތެރޭގައި މިހާރު ޖުމްލަ 19 މީހަކު ޕޮޒިޓިވް ވެފައިވާ ކަމަށެވެ. އެގޮތުން މިއަދުވެސް އެ ރަށުން ހަތަރު މީހަކު ޕޮޒިޓިވްވި ކަމަށް ނަޒްލާ ވިދާޅުވިއެވެ.
ޕޮޒިޓިވް ކޭސްތަކާ ގުޅިގެން ޅޮހި އޮތީ މޮނީޓަރިން ހާލަތުގައެވެ.
ޅޮހި މޮނީޓަރިންގެ ހާލަތަށް ގެނައުމުން މިވަގުތު އެ ރަށުގައި ތިބި އެއްވެސް މީހަކު އެޗްޕީއޭ އިން ވަކިގޮތެއް އަންގަންދެން ރަށުން ފޭބުމާއި، ހުއްދަނެތި އެއްވެސް މީހަކު އެރަށަށް އެރުމަކީ މަނާ ކަމެކެވެ.
