މަސްތުވާތަކެތި އަތުލައިގަތް މައްސަލައެއްގައި، ފައިސާ ދައުރުކޮށްފައިވާ ގޮތް ބަލައިގެން، އެކަމުގައި ޝާމިލުވާ ބައެއްގެ މައްޗަށް ރާއްޖޭގައި ފުރަތަމަ ފަހަރަށް މަނީ ލޯންޑްރިންގެ ދައުވާކޮށްފި އެވެ.
ޕްރޮސިކިއުޓާ ޖެނެރަލް (ޕީޖީ) ހުސައިން ޝަމީމް އޭނާގެ އަމިއްލަ ބްލޮގްގައި ލިޔުއްވި ލިޔުމެއް ހިއްސާކޮށް ކުރި ޓްވީޓްތަކެއްގައި ބުނެފައިވަނީ މަސްތުވާތަކެތީގެ މައްސަލައަކީ، ޖިނާއީ ޢަދުލުގެ ނިޒާމުގައި އޮތް އެންމެ ބޮޑު މައްސަލަ ކަމަށާއި، އަދި ޙައްލުކުރަން އެންމެ ދަތި އެއް މައްސަލަ ކަމަށެވެ.
ޖަލުގެ އާބާދީގެ ބޮޑު ޕަސެންޓަކީ "ޓަރމިނޭޝަން" ޙުކުމުގައި ތިބި މީހުންކަން ފާހަގަކޮށް ޕީޖީ ޝަމީމް ވިދާޅުވީ، މަސްތުވާތަކެތި ބޭނުންކުރާ މީހުން، އެއާދަ ހިފެހެއްޓުމަށް ކުދި ކުދި ވައްކަން ކުރާކަމަށާއި، އެ ހުރިހާ މައްސަލައެއް ކޯޓަށް ހުށަހެޅުމުން ކޯޓުތައް ތާށިވެ، ލަސްވާކަމަށެވެ. މަސްތުވާތަކެތި ރާއްޖެ އެތެރެކޮށް ވިޔަފާރިކުރާ މީހުންގެ ފަހަތުން ދާންޖެހޭކަމަށާއި، ފުލުހުންގެ ބުރަ މަސައްކަތުން ލައްކަ ގިނަ ނެޓްވޯރކްތައް ރޫޅާލެވިއްޖެ ކަމަށް ޝަމީމް ވިދާޅުވިއެވެ. އަދި ދެން އޮތް މަރުހަލާއަކީ، މިކަމުގައި އުޅޭ އަސްލު 'ވިޔަފާރިވެރިން' ފަހަތުން ދިއުން ކަމަށް ޝަމީމް ވިދާޅުވިއެވެ.
"މަނީ ލޯންޑްރިންގެ ކުށް ފުރިހަމަވުމަށްޓަކައި ބޭނުންވަނީ، އޭނާއަށް ލިބި، ބޭނުންކުރި ފައިސާއަކީ، ކުށެއް ކޮށްގެން ހޯދާ ފައިސާކަން އޭނާއަށް ޝައްކުވުމެވެ. ކަނޑައެޅިގެން އެނގުންވެސް ލާޒިމެއް ނޫނެވެ. މަސްތުވާތަކެތީގެ ވިޔަފާރި ކުރާ މީހެއްގެ އަތްބަކު، އޭނާގެ ފިރިމީހާ ފައިސާ ހޯދާ ތަނެއް ނޭނގޭކަމަށް ބުނުމަކީ އަޅުގަނޑަށް ޤަބޫލުކުރަން ދަތި ކަމެކެވެ. ފައިސާ ލިބޭ ގޮތް ނޭނގޭކަމަށް ބުނާއިރު، އެފައިސާ، ޝައްކު އުފެދޭ ކަންކަމަށް ބޭނުންކޮށްފައި ހުރިކަން ތަޙުޤީޤަށް ފެނެއެވެ." ޕީޖީ ޝަމީމް އޭނާގެ އަމިއްލަ ބްލިގްގައި ލިޔުއްވާފައިވެއެވެ.
ޝަމީމް ވިދާޅުވީ މަސްތުވާތަކެތީގެ މައްސަލަތަކުގައި ދައުވާކުރުމަށް ޕީޖީން ގެންގުޅޭ އުސޫލަސް ބަދަލެއް ގެނެސްފައިވާކަމަށެވެ. އެގޮތުން މަސްތުވާތަކެތީގެ ވިޔަފާރި ކޮށްގެން ލިބޭ ފައިސާ ބޭނުންކުރާ މީހުންގެ މައްޗަށް މަނީލޯންޑްރިންގެ ދައުވާ ކުރަން ފަށާފައިވާ ކަމަށާއި، އެފަދަ ފުރަތަމަ މައްސަލަ މާޗް 18 ވަނަ ދުވަހު ކްރިމިނަލް ކޯޓަށް ހުށަހަޅާފައިވާކަމަށެވެ.
އެގޮތުން ދައުވާ ކޮށްފައިވަނީ ގދ. ތިނަދޫ، ރަންގަލް، ޙަސަން ލޫޠްއާއި، ހުޅުމާލެ ފްލެޓް ނަންބަރު 01-ޖީ-45، ޙަސަން ރަޝީދާއި، ތ. ތިމަރަފުށި، ވައިޓްރޯސް، އިސްމާޢީލް ޝަރީފްއާއި، މއ. ހަސްލަތު، ޝަނިޔާ އިބްރާހީމް، 12 ޖަނަވަރީ 2021 ވަނަ ދުވަހު އިތުރު ބަޔަކާ ގުޅިގެން ދިވެހިރާއްޖެއަށް މަސްތުވާތަކެތި އެތެރެކޮށް އެތަކެތި ބޭނުންކޮށް ގެންގުޅެ އެތަކެތި ޓްރެފިކްކުރާކަމަށް ތުހުމަތުކުރެވިގެން މާލޭގެ 04 ގެއެއް ބަލައިފާސްކޮށް ފުލުހުން ހިނގި އޮޕަރޭޝަންގައި ގިނަ ޢަދަދެއްގެ މަސްތުވާތަކެތި ފެނުނު މައްސަލައިގައެވެ. އެމައްސަލައިގައި، އިސްމާޢީލް ޝަރީފާއި، ޝާނިޔާ އިބްރާހީމާއި ޙަސަން ރަޝީދާއި . ޙަސަން ލޫޠުގެ މައްޗަށް، މަސްތުވާތަކެތި ޓްރެފިކް ކުރުމުގެ ކުށުގެ ދައުވާގެ އިތުރުން މަނީ ލޯންޑްރިންގެ ދައުވާ ކޮށްފައިވާކަމަސް ޕީޖީ ވިދާޅުވިއެވެ.
މީގެ އިތުރުން ޕީޖީ ޝަމީމް އޭނާގެ އަމިއްލަ ބްލޮގްގައި ބުނެފައިވަނީ ޖިނާއީ ޢަދުލުގެ ނިޒާމުން ކުރާ މަސައްކަތުގެ މައިގަނޑު ފޯކަހަކީ، މަސްތުވާތަކެތީގެ ވިޔަފާރިން މަންފާވާ، އެކަމުގެ އަޞްލު 'ވިޔަފާރިވެރިން' ފަހަތުން ދިއުމަށް ހެދުންކަމަށެވެ.
"ހަމައެކަނި އެމީހުން އަތުން ފެންނަ ފައިސާއެއް ނޫނެވެ. އެމީހުންގެ ވިޔަފާރިތަކާއި، ވެހިކަލްތަކާއި، އެނޫންވެސް ހުރިހާ މުދަލެއް، މަނީ ލޯންޑްރިންގ ޤާނޫނު ބޭނުންކޮށްގެން ދައުލަތަށް ނެގުމެވެ." ޝަމީމްގެ ބްލޮގްގައި ލިޔުއްވާފައިވެއެވެ.
