ރޭގަނޑު ނިދުމަކީ ކިހާ މުހިއްމު ކަމެއްކަން އަހަރެމެން އެންމެންނަށް ވެސް އެގެއެވެ. ނަމަވެސް ރޭގަނޑު ހަމަނިދި ނުނިދެނީ ކިތައް މީހުނަށް ހެއްޔެވެ؟ އެހެނީ ވަޒީފާގެ ސަބަބުންނާއި ކުރަންޖެހޭ މަސައްކަތުގެ ގޮތުން ރޭގަނޑުގެ ނިދިން މަހުރޫމްވާންޖެހޭ އެތައްބަޔަކު އަހަރެމެންގެ މި މުޖުތަމަޢުގައިވެސް އެބަ އުޅެއެވެ. އަދި މި ނޫނަސް ބައްޔެއްގެ ސަބަބުން ނުވަތަ ޚިޔާލާއި ފިކުރުތައް ގިނަކަމުން ނުނިދޭ މީހުންވެސް އުޅެއެވެ. އަދި ބައެއް މީހުނަކީ ތިމާއަށް ނުނިދެނީ ކީއްވެކަން ނޭނގޭ މީހުންނެވެ. އެހެން ނަމަވެސް ރޭގަނޑުގެ ހަމަ ނިދި ނުލިބިއްޖެނަމަ ސިއްޙީ އެތައް މައްސަލަ އަކާއި ނަފުސާނީ މައްސަލަތައް ކުރިމަތިވެއެވެ.
މިގޮތުން ރޭގަނޑު ހަމަ ނިދި ނުލިބެއްޖެނަމަ ކުރިމަތި ވާނެ މައްސަލަތައްކަމަށް ދިރާސާ ކުރައްވާފައިވާ ފަރާތްތަކުން ހާމަކުރައްވާފައިވާ ކަންތައްތައް ހިމަނާލާނަމެވެ.
ހަމަ ނިދި ލިބިއްޖެނަމަ މީހާގެ މޫޑު ރަނގަޅުވޭ
ރަނގަޅަށް އަރާމު ކުރެވިއްޖެނަމަ، އެދުވަހަކު ތިމާގެ މޫޑު ރަނގަޅުވެ ކަންތައްތައް ކުރުމަށް ފަސޭހަވާކަން ޚުދު ތިމާއަށްވެސް އެނގޭނެ އެވެ. އެއީ ރޭގަނޑުގެ ހަމަނިދި ލިބުމުން ހަށިގަނޑަށް ހަކަތަ ލިބި ހަށިގަނޑަށް ލުއިފަސޭހަކަން ލިބޭތީ އެވެ. ވީމާ ކޮންމެ މީހަކުވެސް ބަލަންވީ ރޭގަނޑު އަވަހަށް ނިދާފައި 7 ނޫނީ 8 ގަޑި އިރުގެ ނިދި ހަމަކުރުމަށެވެ.
ހަމަނިދި ލިބުމުން ދިފާއީ ނިޒާމު ވަރުގަދަވޭ
ރަނގަޅަށް ރޭގަނޑު ނިދިއްޖެނަމަ ސިނކުޑީގެ މަސައްކަތް ރަނަގަޅުވެއެވެ. އަހަރެމެން އެންމެންނަށްވެސް އެނގޭނެފަދައިން ސިކުނޑިއަކީ އަހަރެމެންގެ ހަށިހަޑުގެ ހުރިހާ ހަރަކާތެއް ހިނގުމުގެ މައި މަރުކަޒެވެ. އެހެންކަމުން ސިކުޑީގެ މަސައްކަތް ރަނގަޅަށް ހިނގާނަމަ މީހާގެ ދިފާއީ ނިޒާމުވެސް ރަނގަޅުވާނެއެވެ. އެހެނީ ރޭގަނޑު ރަނގަޅަށް ނިދުމުން ސިނކުޑިއަށް ލޭ ދައުރުކުރާ ނާރުތަކުގެ މަސައްކަތް ރަނގަޅުވެ ހަރަކާތްތައް ފުރިހަމަވެއެވެ.
މަސައްކަތަށް ސަމާލުކަން ދެވުމާއި މަސައްކަތުގެ ފެންވަރު ރަނގަޅުވޭ
ނިދުމަކީ ސިކުޑިއަށް އަރާމު ލިބޭ ކަމަކަށް ވުމުން ތިމާގެ މަސައްކަތަށް އެކަމުގެ އަސަރު ކުރެއެވެ. އެހެންކަމުން ކުރާ މަސައްކަތް ރަނގަޅުވެފައި ފުރިހަމަވެއެވެ. އޭގެ ސަބަބުން ރަނގަޅު ވިސްނުމާއި މޮޅު ޚިޔާލު ލިބި ފައިދާހުރި ކަންތައްތައް ކުރެވެއެވެ.
ނިދި މަދުވުމުގެ ސަބަބުން ހިތުގެ ބަލިތަކާއި "ސްޓްރޯކް" ޖެހުމަށް މަގުފަހިވޭ
ބޭނުންވާ ވަރަށް ނިދި ނުލިބިއްޖެނަމަ ސިކުނޑީގައި ލޭގަނޑު ވުމުގެ މައްސަލަ ދިމާވެއެވެ. އަދި ހިތުގެ ބަލިތައް ޖެހުމަށް މަގު ފަހިވެއެވެ. މިގޮތުން ކުރެވުނު ތަފާތު 15 ދިރަސާ އެއް ދައްކާގޮތުގައި ރޭގަނޑު 7 ނޫނީ 8 ގަޑި އިރު ނުނިދޭ މީހުންނަށް ހިތުގައި ލޭގަނޑު ވުމާއި ސިކުނޑީގައި ލޭގަނޑުވުން އިތުރުވެއެވެ. މި ދިރަސާތަކުން ދެއްކީ ރޭގަނޑު ހަމަނިދި ނިދާ މީހުނަށް ވުރެ ހަމަ ނިދި ނުލިބޭ މީހުންނަށް މިފަދަ ބަލިތައް ޖެހުން ގިނަ ކަމެވެ.
ހަށިގަނޑަށް "އިންފްލަމޭޝަން" މައްސަލަ ކުރިމަތިވޭ
ހަމަ ނިދި ނުލިބިއްޖެނަމަ ގިނަދުވަސްތަކަކަށް ފަރުވާ ކުރަންޖެހޭފަދަ ބަލިތަކަށް ހުށަ ހެޅެއެވެ. މިގޮތުން ހަށިގަނޑުގެ "ސެލް" ތައް ހަލާކުވެ ގޮހުރެގެ ބަލިތަކާއި ހަޖަމުކުރުމުގެ ނިޒާމަށް ޖެހޭ ބަލިތައް އިތުރުވެއެވެ.
ނިދި ހަމަނުވުމުގެ ސަބަބުން ކެއުން އިތުރުވޭ
ހަމަ ނިދި ލިބޭ މީހުންގެ ހަށިގަނޑުގައި ހުންނަ ސަރުބީ އިން ހަކަތަ އުފައްދައިދެއެވެ. އަދި ސަރުބީތައް ވިރެއެވެ. ނަމަވެސް ދިރަސާ ތަކުން ދައްކާ ގޮތުގައި ރޭގަނޑު ހަމަ ނިދި ނުލިބޭ މީހުން ހަށިގަނޑުގެ ސަރުބީ ވިރުވައިދޭ ލެއް ދައްވެއެވެ. އަދި އެމީހުން ކާތަކެތީން ލިބޭ ހަކަތަވެސް މަދުވެ އެވެ. އެހްނކަމުން ހަމަ ނިދި ނުލިބޭމީހުން ހަކަތަ ލިބޭ ތަކެތި ގިނައިން ކާން ޖެހެއެވެ. އަދި މި މީހުންގެ ކެއެމުގެ އާދަ އެއްގޮތެއްގައި ނުހިފޭއްޓެއެވެ.
