ކޮވިޑް-19 އާ ގުޅިގެން މާލެ ސަރަހައްދުގައި ވަކި ވަގުތުތަކެއްގައި ވެހިކަލް ނުދުއްވޭ ގޮތަށް އޮތް އޮތުން ބާތިލްކޮށްފިއެވެ.
އެޗްޕީއޭގެ ޑިރެކްޓަރު ޖެނެރަލް މައިމޫނާ އަބޫބަކުރު ސޮއިކުރައްވައި ނެރުނު ނެރުއްވި ބަޔާނުގައި ބުނެފައިވަނީ މާލެ ސަރަހައްދުގައި ހަވީރު 6 އިން ހެނދުނު 6 އަށް ވެހިކަލް ދުއްވަން މަނާކުރަން އެންގި އެންގުން ބާތިލުކުރާ ކަމަށެވެ.
މާލެ ސަރަހައްދުގައި އެއްގަމު އުޅަނދު ފަހަރު ދުއްވުން ފުރަތަމަ މަނާކުރީ ރޭގަނޑު 8:30 އިން ފަތިހު 4:30 އަށް ދެ ހަފުތާގެ މުއްދަތަށެވެ. ނަމަވެސް ކޮވިޑް-19 ގެ ކޭސްތައް އިތުރުވަމުންދާތީ އެޗްޕީއޭ އިން ވަނީ މިދިޔަ މަހުގެ 12 ވަނަ ދުވަހު ހަވީރު 6 އިން ހެނދުނު 6 އަށް ވެހިކަލް ދުއްވުން މަނާކޮށްފައެވެ.
ވެހިކަލް ކާފިއު އުވާލި ނަމަވެސް މާލެ ސަރަހައްދުގައި އަދިވެސް ރޭގަނޑު 11 އިން ފެށިގެން ފަތިހު 4:30 އާ ދެމެދު މީހުން ބޭރަށް ނުކުމެ އުޅުމަކީ މަނާ ކަމެކެވެ.
