މާލެ ސަރަހައްދުގެ ޕާކުތާކާއި މައިޒާންތައް ބަންދުކުރުން ނިންމި ނިންމުން ބާތިލްކޮށްފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) ރޭ ދަންވަރު ނެރުނު އެންގުމުގައި ވަނީ އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން އަޅާންޖެހޭ ހާއްސަ ފިޔަވަޅުތައް އެޅޭ ގޮތަށް އޮންނައިރު، މާރިޗް ހަތަރު ވަނަ ދުވަހު އަންގައިފައިވާ އެންގުމު ގައި ހަތް ދުވަހުގެ މުއްދަތަށް އެޅުމަށް ނިންމައިފައިވާ ފިޔަވަޅުތަކުގެ ތެރެއިން ޕާކުތާކާއި މައިޒާންތައް ބަންދުކޮށްފައި އޮންނަ ގޮތަށް އޮތް އޮތުން މިއަދުން ފެށިގެން ބާތިލް ކޮށްފައިވާ ކަމަށެވެ.
އަދި މީގެ އިތުރުން އެ އެންގުމުގައި ހަތް ދުވަހުގެ މުއްދަތަށް އެޅުމަށް ނިންމައިފައިވާ އެހެނިހެން ފިޔަވަޅުތަކުގެ މުއްދަތު، މިއަދުން ފެށިގެން ހަތް ދުވަހުގެ މުއްދަތަށް، އިތުރުކުރުމަށް ނިންމާފައިވާ ކަމަށް އެ އެންގުމުގައި ވެއެވެ.
