ފުލުހުންގެ ޚިދުމަތުގެ އައު ޤާނޫނުގެ ދަށުން ހުރިހާ ފުލުހުން ކުރެއްވި ހުވަޔާއެކު ޚިދުމަތުގެ ފެންވަރުމަތިވެ، މިހާރަށްވުރެ ރައްޔިތުންނާ ގާތުން މަސައްކަތްކުރާ ބަޔަކަށް ފުލުހުން ވެގެންދާނެ ކަމަށް ޤަބޫލުކުރައްވާކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ފުލުހުންގެ ޚިދުމަތުގެ އައު ޤާނޫނަށް މިއަދު އަމަލުކުރަން ފެށުމާއި ގުޅިގެންނެވެ. އައު ޤާނޫނުގެ ދަށުން ހުރިހާ ފުލުހުން މިއަދު ވަނީ ހުވައި ކުރައްވާފައެވެ.
ރައީސް ވަނީ ފުލުހުންގެ އައު ޤާނޫނަށް މިއަދު ޢަމަލުކުރަން ފެށުމާއި ގުޅިގެން ހުރިހާ ފުލުހުންނަށް ތަހުނިޔާ އަރިސްކުރައްވާފައެވެ. ރައީސް ވިދާޅުވީ، އާ ޤާނޫނުގެ ދަށުން ހުރިހާ ފުލުހުން ކުރެއްވި ހުވަޔާއެކު ޚިދުމަތުގެ ފެންވަރުމަތިވެ، މިހާރަށްވުރެ ރައްޔިތުންނާ ގާތުން މަސައްކަތްކުރާ ބަޔަކަށް ފުލުހުން ވެގެންދާނެ ކަމަށް ޤަބޫލުކުރައްވާކަމަށެވެ.
ފުލުހުންގެ ޚިދުމަތުގެ ޤާނޫނަކީ ދިވެހި ފުލުހުންގެ ޚިދުމަތުގެ އެންމެހައި ކަންކަމަކީ ޤާނޫނުއަސާސީއާއި، ޤާނޫނުއަސާސީގައި ބަޔާންކޮށްފައިވާ ދުސްތޫރީ ހަމަތަކާއި، އިންސާނީ ޙައްޤުތަކާއި ކަރާމަތަށް އިޙްތިރާމުކުރުމާއެކު ޤާނޫނުގެ ޙުކޫމަތުގެ ތެރެއިން ދެވޭ ޚިދުމަތެއްކަން ކަށަވަރުކުރުމަށް ވުޖޫދަށް ގެނެސްފައިވާ ޤާނޫނެކެވެ. މީގެ އިތުރުން ރައްޔިތުންނާ ގުޅިގެން ޚިދުމަތްދިނުން އިސްކޮށް، ޕްރޮފެޝަނަލްކޮށް މަސައްކަތްކުރުމުގެ ވައްޓަފާޅި ފުލުހުންގެ ޚިދުމަތުގެ އެންމެހައި މުވައްޒަފުންގެ ކިބައިގައި އަށަގެންނެވުމާއި، ދިވެހި ފުލުހުންގެ ޚިދުމަތަކީ ލާމަރުކަޒީ އުސޫލުން ފޯރުކޮށްދޭ ޚިދުމަތަކަށް ހެދުމަށްވެސް މި ޤާނޫނު ބާރުއަޅައެވެ.
އައު ޤާނޫނަށް ޢަމަލުކުރަން ފެށުމާއެކު، ފުލުހުންގެ ޤާނޫނު ގެ ދަށުން ޤާއިމުކުރެވިފައިވާ “މޯލްޑިވްސް ޕޮލިސް ސަރވިސް”، މި ޤާނޫނުގެ ދަށުން އުފައްދާ “ދިވެހި ފުލުހުންގެ ޚިދުމަތް” އަށް ބަދަލުވާނެއެވެ. ނަމަވެސް “ދިވެހި ފުލުހުންގެ ޚިދުމަތަށް” އިނގިރޭސި ބަހުން ބޭނުންކުރާނެ ނަމަކީ “މޯލްޑިވްސް ޕޮލިސް ސަރވިސް”އެވެ.
ފުލުހުންގެ ޚިދުމަތުގެ ޚާއްޞަ ސިފަތަކުގެ ތެރޭގައި ފުލުހުންނަކީ ދިވެހި ސިވިލް ސަރވިސްގައި ނުހިމެނޭ، މަދަނީ އަދި ސަލާމަތީ ޚިދުމަތެއްގެ ގޮތުގައި ހިމެނުން ހިމެނެއެވެ. އަދި ވަޒީފާއާބެހޭ ޤާނޫނުން އިސްތިސްނާ ލިބިގެންވާ ޚިދުމަތެއްގެ ގޮތުގައި ފުލުހުންގެ ހިދުމަތް ވަނީ ކަނޑައަޅާފައެވެ.
