ފްރީ ސްކޫލުތައް ހުޅުވައި، ޔުނިވާސިޓީ ތަކާއި ކޮލެޖުތަކަށް ހާޒިރުވެގެން ކްލާސްތައް ކުރިއަށް ގެންދަން ހުއްދަދީފިއެވެ.
އެޗްޕީއޭ އިން މިއަދު ބުނީ ކޮވިޑް ކޮންޓްރޯލު ކުރުމަށް އަޅާފައިވާ ބައެއް ފިޔަވަޅުތައް ދަމަހައްޓައި، ބައެއް ފިޔަވަޅުތަކަށް ލުއި ދީފައިވާ ކަމަށެވެ.
އެގޮތުން މިހާރު ޔުނިވާސިޓީ ތަކާއި ކޮލެޖުތަކަށް ހާޒިރުވެ ކިޔެވުން ކުރިއަށް ގެންދިޔުން މެދުކަނޑާލާފައި އޮތް އޮތުން ނިމުމަކަށް ގެނެސް ރައްކާތެރިކަމުގެ ފިޔަވަޅުތަކާއެކު ޔުނިވާސިޓީތަކާއި ކޮލެޖުތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދިއުމަށް ނިންމާފައިވާ ކަމަށެވެ.
މީގެ އިތުރުން މިނިސްޓްރީ އޮފް އެޑިއުކޭޝަނުން ކަނޑައަޅާ ގޮތެއްގެ މަތީން، ރައްކާތެރިކަމުގެ ފިޔަވަޅުތަކާއެކު ޕްރީސްކޫލް ތަކާއި، ކިޔެވުން ފެށުމަށް ވެސް ވަނީ ހުއްދަ ދީފަ އެވެ.
