އިޒްރޭލު ސިފައިން ތައްޔާރީ ހާލަތުގައި ތިބުމަށް އިޒްރޭލުގެ ބޮޑު ވަޒީރު ބެންޔަމީން ނަތަންޔާހޫ އަންގަވައިފިއެވެ. ޢައްޒާއާއި ޤުދުސްގައި ހިނގަމުންދާ ހަމަނުޖެހުންތައް ވަޒަން ކުރެއްވުމަށް ބޭއްވެވި ތިން ގަޑިއިރުގެ ބައްދަލުވުމަށްފަހު ވިދާޅުވެފައި ވަނީ ޣާއްޒާގައި ކޮންމެ ފަދަ ހާލަތަކާވެސް ކުރިމަތިލާން ޖެހިދާނެ ކަމަށެވެ.
ފަލަސްތީނު މީހުންނާ ދެކޮޅަށް ބަރަކާތްތެރި ރަމަޟާން މަހު ޔަހޫދީ ދައުލަތުން އިތުރު ހުރަސް އަޅައި، މަސްޖިދުލްއަގްސާއަށް ވަނުމަށް ހުރަސް އެޅުމުން ފަލަސްތީނު މީހުންވެސް ވަނީ ހަރުކަށިކަން ދައްކާފައެވެ. ގުދުސްގައި މުޒާހަރާ ކުރި ޒުވާނުންނާ ދެކޮޅަށް އިޒްރޭލު ސިފައިން އަނިޔާވެރިވުމުން، ޣައްޒާއިން ވަނީ ޔަހޫދީ ސަރަހައްދުތަކަށް ރޮކެޓް ހަމަލަ ދީފައެވެ. އިޒްރޭލުން ވަނީ ރައްދުގައި މަތިން ދާބޯޓުތަކުން ބޮން އަޅާފައެވެ.
އެމެރިކާއާއެކު މަޝްވަރާއަށް ވަޑައިގަތުމަށް ހަމަޖެހިފައި އޮތް އިޒްރޭލުގެ ޗީފް އޮފް ސްޓާފްގެ ދަތުރުވެސް މި ފަސް މަންޒަރުގައި މިހާރު ވަނީ ކެންސަލް ކޮށްފައެވެ.
މަސްޖިދުލް އަގްސާ ސަރަހައްދަށް ފަލަސްތީނުން މީހުން ކައިރިވިޔަ ނުދިނުމަށް އިޒްރޭލު ސިފައިން، ނޭއްގާނީ އަމަލުތައް ހިންގާތާ މިހާރު 11 ރޭ ވެގެން ދަނީއެވެ.
އިޒްރޭލުން ބުނާ ގޮތުގައި ފަލަސްތީނު މީހުން ފޮނުވާލި 36 ރޮކެޓަކަށް އިޒްރޭލުގެ ދިފާއީ ނިޒާމުން ހުރަސް އަޅާފައި ވެއެވެ.
އިޒްރޭލުގެ އުދުވާނަށް ބަދަލު ހިފާނެ ކަމަށް ހަމާސްއާއި ޖިހާދުލް އިސްލާމީއާއި ފަތަޙަ ޖަމާއަތުން ވަޒީ އިންޒާރު ދީފައެވެ.
އިޒްރޭލުގެ އަމަލުތައް ކުށްވެރި ކުރި ފަރާތްތަކުގެ ތެރޭގައި އދއާއި މިސްރާއި އުރުދުން އަދި އޯއައިސީ ހިމެނެއެވެ. އެމެރިކާއިން ވަނީ ދެ ފަރާތަށްވެސް ނަފްސް ކޮންޓްރޯލު ކުރުމަށް ގޮވާލާފައެވެ.
