އިންޑިއާއިން ޖައްމޫއާއި ކަޝްމީރުގައި ސިނާއީ މަސައްކަތަށް ހިތްވަރު ދިނުމުގެ ގޮތުން 290 މިލިއަން ރުޕީސް ކަނޑައަޅައިފިއެވެ. މި މަޝްރޫއުގެ ދަށުން ދިގު މުއްދަތަށް ދެމި ހުންނަ އިންވެސްޓްމެންޓަށް ހިތްވަރު ދިނުމަށް ނިންމާފައި ވެއެވެ. އެގޮތުން މެޝިނަރީއާއި އިމާރާތްތަކަށް ފަންޑު ކުރުން ހިމެނެއެވެ.
މީގެ މަގްސަދަކީ، 2037އާ ހަމައަށް މި ސްކީމު ކުރިއަށް ގެންދިއުމެވެ. ސަރުކާރުން ލަފާ ކުރާ ގޮތުގައި މީގެ ސަބަބުން ފަސް ލައްކައެއްހާ މީހުންނަށް ވަޒީފާގެ ފުރުސަތު ފަހިވެގެން ދާނެއެވެ.
ޖައްމޫ ކަޝްމީރުގައި ސިނާއީ މަސައްކަތަށް ހިތްވަރުދޭއިރު، މުޅި ސަރަހައްދު ވަނީ ދެ ޒޯނަކަށް ބަހާފައެވެ.
ޒޯން އޭގައި ހިންގާ މަޝްރޫއުތަކަށް ހިތްވަރު ދިނުމުގެ ގޮތުން ސަރުކާރުން ދޭނީ 30 އިންސައްތައެވެ. އަދި ޒޯން ބީގައި ހިންގާ މަޝްރޫއުތަކަށް 50 އިންސައްތަ ދޭނެއެވެ.
މީގެ އިތުރުން މި ތަންތަނުން އުފައްދާ ތަކެއްޗަށް ޖީއެސްޓީ ކުޑަކުރުމަށްވެސް ނިންމާފައި ވެއެވެ.
އެއްވެސް ސަރަހައްދެއް ބާކީ ނުކޮށް ކުރިއަށް ގެންދިއުމުގެ ގޮތުން ޒޯން ބީގައި ހިމަނާފައި ވަނީ ދުރު ހިސާބުތަންތަނެވެ.
