ދުނިޔޭގެ އެންމެ ބޮޑު ނިއުކްލިއަރ ޕަވަރ ޕްލާންޓް އިންޑިއާގައި ހެދުމަށް ފަރަންސޭސި އީޑީއެފްއިން އަނެއްކާވެސް މަސައްކަތް ފަށައިފިއެވެ. މީގެ ކުރިންވެސް އީޑީއެފްއިން ގެންގުޅު މިޕްރޮޖެކްޓްގެ މަސައްކަތް ހުއްޓުނީ އެތެރޭގެ ޕޮލިޓިކްސްއާއި ނިއުކްލިއަރއާ ގުޅޭ ބައެއް މައްސަލަތަކާ ގުޅިގެންނެވެ.
އީޑިއެފް އިން ބުނެފައިވާ ގޮތުގައި އިންޑިއާ ސަރުކާރަށް އެކުންފުނިން ވާނީ، ފަންނީ ދިރާސާތަކާ ސާމާނުތަކާ ބެހޭ ހުށަހެޅުންތައް ހުށަހަޅާފައެވެ. މި ހުށަހެޅުމަކީ، އެކުންފުނިން އުފައްދާ ތިން ވަނަ ޖީލުގެ ހަ ރިއެކްޓަރ، އުފައްދައި ބެހެއްޓުމުގެ ހުށަހެޅުމެވެ.
މި ރިއެކްޓަރތައް ނިމުމުން ގާތްގަނޑަކަށް 70 މިލިއަން ގެއަށް ބޭނުންވާ 10 ގިގަވޮޓްގެ އިލެކްޓްރިކް އުފެއްދޭނެއެވެ.
މިމަސައްކަތް އެއްކޮށް ނިންމާލަން 15 އަހަރު ނަގާނެ ކަމަށް ކުންފުން އަންދާސާ ކުރެއެވެ.
މި މަސައްކަތާ ގުޅޭ މާލީ މަޢްލޫމާތު ހާމަ ކޮށްފައެއް ނުވެއެވެ. ނަމަވެސް ލަފާ ކުރެވޭ ގޮތުގައި ދިހަ ބިލިއަން ޑޮލަރު މި މަޝްރޫއަށް ހޭދަވާނެއެވެ.
އީޑީއެފްގެ ނިއުކްލިއަރ މަޝްރޫއަކީ، ވިއްސަކަށް އަހަރު ވެއްޖެ ޚިޔާލެކެވެ. އެންމެ ފަހުން 2011 ގައި ޖަޕާނުގެ ނިއުކްލިއަރ ކާރިސއާ ގުޅިގެން މިކަން އަނެއްކާވެސް ފަސް ކުރީއެވެ. އަދި މަހާރާޝްޓްރާގައި މިހާރު ވެރިކަން ކުރާ ޝީވް ސޭނާއިން ވަނީ އެއިރު މި މަޝްރޫއާ ދެކޮޅަށް ވާހަކަ ދައްކާފައެވެ. މިމަޝްރޫއު ބިނާ ކުރުމަށް ހަމަޖެހިފައި ވަނީ މަހަރާޝްޓްރާގައެވެ. މިއިން 25 ހާސް މީހުންނަށް ވަޒީފާ ލިބޭނެ ކަމަށް ބެލެވެއެވެ.
އިންޑިއާއިން ނިއުކްލިއަރ ޓެކްނޮލޮޖީ ހިއްސާކުރުމަށް އެތައް އެއްބަސްވުމެއް އެކުލަވާލާފައި ވެއެވެ. އޭގެ ތެރޭގައި، ޔޫއެސް، ފްރާންސް، ރަޝިޔާ އަދި ޖަޕާން ހިމެނެއެވެ. ރަޝިޔާއަކީ ނިއުކްލިއަރ ފިއުލްއާއި ރިއެކްޓަރތައް އިންޑިއާއިން ހޯދާފައިވާ ގައުމެވެ.
މި ވަގުތުވެސް އިންޑިއާގައި މަސައްކަތް ކުރާ 22 ނިއުކްލިއަރ ރިއެކްޓަރ އެބަހުއްޓެވެ. މިއިން ލިބެނީ އިންޑިއާއަށް ބޭނުންވާ ހަކަތައިގެ ތިން ޕަސެންޓެވެ.
