ނައިޖޭރިއާގެ ޕާލަމެންޓްގެ މެންބަރުންނަށް ގާނޫނު އެކުލަވާލުމާއި ދިރާސާ ކުރުމަށް އެހީތެރިވެދިނުމަށް ދާއިމީ މުވައްޒަފުންނާއި ވަގުތީ މުވައްޒަފުންނާއެކު ޖުމުލަ ފަސްހާހެއްހާ ޒުވާނުން ހަރަކާތްތެރިވެއެވެ. ނޭޝަނަލް އެސެމްބްލީ ލެޖިސްލޭޓިވް އެއިޑްސް ފޯރަމް ޖަމުއިއްޔާއިން ބުނާ ގޮތުން މިދިޔަ އަހަރުން ފެށިގެން އެ ޖަމުއިއްޔާގެ މެމްބަރުންނަށް ފުރިހަމައަށް މުސާރަ ދީފައެއް ނުވެއެވެ. މިއީ ނައިޖޭރިއާގެ މިހާރުގެ މާލީ ހާލަތު ކުރަހައިދޭ ކުޑަ ކުޑަ މަންޒަރެކެވެ.
އްފްރިކާގެ ބައިބޯ ތެލުގެ މުއްސަނދި ގައުމު ނައިޖޭރިއާއަކީ، ބޭރުގެ ދަރަނި ބޮޑު ގައުމެކެވެ. ނައިޖޭރިއާގައި ކުރީ ސަރުކާރުން ޗައިނާއިން ލޯން ނަގައިގެން ފަށާފައިވާ މަޝްރޫއުތަކުން ޗައިނާއަށް ބޮޑެތި އަދަދުން ދަރާފައި ވެއެވެ.
އެގައުމުގެ އަމިއްލަ ޖަމުއިއްޔާއެއް ކަމަށްވާ، ޓްރާންސްފޯރމިންގ އަޕްލިފްޓިންގ އެންޑް ރިފޯމިންގ ނައިޖޭރިއާ (ޓަރން) އެންޖީއޯއިން ބުނެފައި ވަނީ، ޗައިނާއިން ލޯން ނަގައިގެން ހަދާފައިވާ މަޝްރޫއުތައް ދެކޮޅު ނުޖެހޭތީ ޗައިނާގެ ލޯންތަކަށް ފައިސާ ދެއްކުން ނައިޖޭރިއާއަށް ފަސޭހައެއް ނުވާނެ ކަަމަށެވެ.
ޓަރންގެ ރައީސް ޑރ. އޭޖީ އަހުމަދު ސަރުކާރަށް ގޮވާލައްވާފައި ވަނީ، އަދި ދުނިޔެއަށް އަންނާން އޮތް ޖީލުގެ މުސްތަގްބަލްވެސް ދަރުވާލައި ޗައިނާއިން ދަރަނި ނަގަމުން ދިއުމަކީ ނައިޖޭރިއާއަށް ރަނގަޅު ކަމެއް ނޫން ކަމަށެވެ.
ނައިޖޭރިއާގެ ބޭރުގެ ދަރަނީގެ 80 އިންސައްތައަކީ ޗައިނާއަށް ދައްކަން ޖެހޭ ދަރަނި ކަމަށް އޭނާ ބުނެއެވެ. ނައިޖޭރިއާއިން ޗައިނާއަށް ހަތަރު ބިލިއަން ޑޮލަރު ދައްކަން ޖެހޭކަމަށް ލަފާ ކުރެވެއެވެ. މިއިން ގިނަ ލޯން ތަކަކީ ކޮންސެޝަންއަކާއެކު ނަގާފައިވާ ލޯންތަކެއް ނޫނެވެ. އަދި މިއިން އެއްބަސްވުމެއް ހާމަ ކުރުމަށް ޗައިނާއިން ނައިޖޭރިއާއެކު ހަދާފައިވާ އެއްބަސްވުންތައް މަނާ ކުރެއެވެ.
