އަރްމީނިއާ ދަރިކޮޅުގެ މީހުންނާ ދެކޮޅަށް، 1915ގައި، ތުރުކީ ވިލާތުގައި ހިންގާފައިވާ ކަމަކީ، ގަތުލުއާންމެއް ކަމަށް، އެމެރިކާއިގެ ރައީސް ޖޯ ބައިޑެން ވަނީ ނިންމަވާފައެވެ. އެމެރިކާއިން އަރްމަން މީހުންގެ ގަތުލު އާންމެއް ތުރުކީ ވިލާތުގައި ހިންގިކަމަށް ނިންމަނީނަމަ، އެމެރިކާގައި ތަނުގެ އަސްލު ވަޒަންވެރިންނާ ދެކޮޅަށް ހުދު ކުލައިގެ މީހުން ހިންގީ ގަތުލުއާންމެއް ކަމަށް ތުރުކީ ވިލާތުން ނިންމަންވީ ބާވައެވެ؟
އެމެރިކާއަކީ، އެއްވެސް މިންގަނޑަކުން، އިންސާނީ ހައްގުގައި އެހެން ގައުމުތަކާ ދެކޮޅަށް ބަސްބުނެވޭ ފެންވަރުގެ ގައުމެއް ނޫންކަން ދުނިޔޭގެ ޖުރިސްޓުންނާއި ގާނޫނީ މާހިރުން ގަބޫލު ކުރެއެވެ.
މި މައްސަލާގައި އިނގިރޭސވިލާތުގެ އިންޑިޕެންޑެންޓް ނޫހުގައި ލިޔެފައި ވެއެވެ. އެމެރިކާގެ ސެނެޓަރަކު، ސީއެންއެންއަށް ދިން އިންޓަރވިއުގައި ބުނެފައި ވަނީ "އަހަރަމެން ގައުމެއް ބިނާ ކުރީ ސުމަކުން" ކަމަށެވެ! ހަގީގަތެއް ބާވައެވެ؟ އެމެރިކަން މިއުޒިއަމްގައި ރައްކާކޮށްފައިވާ، ރެޑް އިންޑިއަނުންނާއި ހުދު މީހުންނާ ދެމެދުގެ ސުލްހައިގެ އެއްބަސްވުމުގައި އަރަބި އަކުރުން މުހައްމަދު ލިޔެ، ރެޑްއިންޑިއަން މީހާ ކޮށްފައިވާ ސޮޔަކީ ހުދު މީހުން މިހާރުގެ އެމެރިކާ ބައްރުގެ ހަޟާރާ ހަލާކުކޮށްލި އިރު އެތާގެ ކަންތައްތައް އޮތް ގޮތް ފެންނާން އޮތް ހަގީގަތެވެ. މެކްސިކޯގައި ފެންނާން ހުރި ރެޑްއިންޑިއަނުންގެ ޒަމާނުގެ ފައްޅިތައް ކަމަށް ބުނެވޭ ފައްޅިތަކުގައި ހަދާފައި ހުރި މިހްރާބްގެއާއި ގުއްބާއި މުންނާރުތައް އެއީ ހުދު މީހުން އެތަން ހޯދުމުގެ ކުރިންވެސް އެތާގައި ހުރި ތަންތަނެވެ. އެހެންވީއިރު، ކޮން ނަސްލެއް ފަނާކޮށްލައި ކޮން ހަޟާރާއެއް ނެތިކޮށްލައި "ސުމަކުން ގައުމެއް އުފެއްދީ" ކޮން ބައެއް ޔެއްޔެވެ؟
އިންޑިޕެންޑެންޓްގެ ރިޕޯޓްގައި ބުނެފައި ވަނީ އެމެރިކާގެ ހުތުރު ތާރީޚަށް އަމިއްލައަށް އިޢްތުރާފް ނުވަނީނަމަ، އެމެރިކާއިން އަރްމަންގެ ޖެނޮސައިޑާ ބެހޭގޮތުން ދައްކާ ވާހަކައަކީ، މީހުން ބަލައި ނުގަންނާނެ ބޭކާރު ވާހަކައެއް ކަމަށެވެ.
އެމެރިކާގެ ފަސްގަނޑަށް ދޮން މީހުން ފޭބި ހާދިސާއާ ގުޅޭ ގިނަ ކަންކަމަކީ، މިހާރު ލިބެން ހުރި މަޢްލޫމާތުން މުޅިން އޮޅުވާލާފައިވާ ކަންކަމެވެ. ކޮލަމްބަސް މަޝްހޫރު މީހަކަށް ވެގެން އޭނާގެ ނަންމުން ރަށްތަކަށް ނަންދީ ބުދުތައް ހެދިއިރު، އޭނާގެ ކައްޕިތާން އިބްނު މާޖިދުގެ ވާހަކަ ދައްކާކަށް ހުދު މީހުން ބޭނުމެއް ނުވެއެވެ. އަދި ފަޅުވެރިންގެ ގޮތުގައި ފުރައިގެން މި ބޯޓްތަކުގައި ދިޔަ ގިނަ މުސްލިމު އަރަބިންގެ ވާހަކައާއި އެމީހުން އެތާގައި ވަޒަންވެރިވެ، އެނބުރި ނައައި ކަމުގެ ވާހަކަވެސް ވަނީ ސިއްރު ކުރެވިފައެވެ. އަދި ކޮލަމްބަސް ފޭބިއިރު އޭނާއާ ވާހަކަ ދެއްކި މީހުންނަށް އަރަބި ބަހުން ތަރުޖަމާ ކޮށްދިން ވާހަކައަކީވެސް ސިއްރެކެވެ.
ހުދު މީހާ ދައްކައި ދޭން ބޭނުންވީ އެމީހުން ފޭބިއިރު އެމެރިކާއޭ ކިޔުނު ބިމުގައި ތިބީ މިނިމަސް ކައި އުޅޭ ބުދަށް އަޅުކަން ކުރާ ތަހުޒީބެއް ނެތް ބަޔެއް ކަމަށެވެ. ސުއާލަކީ، އެމެރިކާގެ ބައްރުގައި ހުދު މީހުން އަތުން ހަލާކު ނުވެ ސަލާމަތްވި ހަޟާރީ ބިނާތަކުން ފެންނަނީ މިކަން ހެއްޔެވެ؟ މިވަރުގެ ހަޟާރާއެއް މިނިމަސް ކައި އުޅުނު ތަހްޒީބެއް ނެތް ބަޔަކަށް ބިނާ ކުރެވޭނެ ހެއްޔެވެ؟ މާޔާއާއި އެންކާ ހަޟާރާގެ އަގުވައްޓައިލައި ކްރިސްޓިއަނިޓީ މަތި ކުރުމަށް ކުރެވުނު ޕްރޮޕެގެންޑާއެއް ނޫން ހެއްޔެވެ؟ ހޮލީވުޑްގެ ފިލްމުތައްވެސް ދިޔައީ ހަމަ މިމަގުންނެވެ!
އިންސާނީ ހައްގުގެ ވާހަކަ ދައްކާއިރު ޗައިނާ ކުރިމަތީގައި އެމެރިކާ ލަދުގަންނަން ޖެހޭ ހިސާބަށް އެމެރިކާގެ ހާލަތު އޮތީ ގޯސްވެފައެވެ.
