ފުރަތަމަ ރައްޔިތުން ނިކުމެ އެއްބަޔަކު އަނެއް ބަޔަކަށް އޮށްގާ އުކީއެވެ. ދެން ސިފައިން ނިކުމެ އެއް ބަޔަކު އަނެއް ބަޔަކަށް ބަޑި ޖެހީއެވެ. މިއީ ކިރިގީޒިސްތާނާއި ތާޖިކިސްތާނާ ދެމެދު މިއަދު ހަމަލާތައް ބަދަލު ކުރެވުނު ގޮތެވެ.
މައްސަލަ އުފެދުނީ ބަޓްކިން ސަރަހައްދުގެ ފެންގަނޑަކާއި އެތަނުން ފެންނަގާ ޕަމްޕް ސްޓޭޝަނަކާ ހެދި އުފެދުނު ދެބަސްވުމެއްގައެވެ.
ކިރްގީޒިސްތާނުން ބުނަނީ 15 މީހަކަށް ހާނިއްކަވެފައިވާ ކަމަށެވެ. އަދި ތާޖިކިސްތާންގެ ސަރަހައްދުން ބިމެއްވެސް އެމީހުން ހިފައިފި ކަމަށް ބުނެފިއެވެ.
ރޮއެޓަރޒް އިން ބުނަނީ ދެ ފަރާތުން ތިރީހަކަށް ސިފައިންނަށް އެކިވަރުގެ އަނިޔާ ވެފައިވާ ކަމަށެވެ.
މިއީ މާޗް މަހުން ފެށިގެން ހޫނުވަމުން އައި މައްސަލައެކެވެ. ކިރިގީޒިސްތާންގެ ނޭޝަނަލް ސެކިއރިޓީ ކޮމިޓީގެ ރައީސް ވާހަކަ ދައްކަވާފައި ވަނީ ބަޓްކިންގެ ބަދަލުގައި، ތާޖިކިސްތާންގެ ފެހި ބިމެއްކަމަށްވާ ވޯރުޚް ހިފުމަށެވެ.
ދެ ގައުމުގެ ސަރަހައްދު ހުރަސްކޮށް ދިރިއުޅޭ ހިސާބުގަނޑުގެ މީހުންގެ މެދުގައި ދޭތެރޭން ހަމަނުޖެހުން ހިނގައެވެ.
އެޕްރިލް 9 ގައި ތާޖިކިސްތާންގެ ރައިސް އިމާމް އަލީ ރަހްމާނޯވް ވަނީ ވޯރުޚްއަށް ވަޑައިގެން އެ ސަރަހައްދު ކިރިގީޒިސްތާނަށް ދޫކޮށްނުލާނެ ކަމުގެ ގެރެންޓީ ރައްޔިތުންނަށް ދެއްވާފައެވެ.
އަނެއް ކޮޅުން، ކިރިގީޒިސްތާނުން ވަނީ ދެ ހާސް ސިފައިންނާއި 200 ޓޭންކާއެކު ބަޓްކިން ރީޖަންގައި އަސްކަރީ ތަމްރީންތައްވެސް ބާއްވާފައެވެ.
