އިންޑިއާއަށް ބޭނުންވާ އެހީ ދިނުމަށް 40 ގައުމަކުން ނިންމައިފިއެވެ. އިންޑިއާގެ އެކްސްޓާނަލް އެފެއާޒް މިނިސްޓަރ، އެސް ޖަޔަޝަންކަރު ވަނީ ދުނިޔޭގެ ކަންކޮޅުތަކުގައި މިޝަންގެ އިސްބޭފުޅުންނާ ގުޅުއްވައި އިންޑިއާގެ މިހާރުގެ ހާލަތުގެ ވާހަކަ ވިދާޅުވެ ދެއްވާފައެވެ.
އޭނާ ވިދާޅުވީ މި ވަގުތު އިންޑިއާއަށް ބޭނުން ވަނީ މެޑިކަލް އޮކްސިޖަންއާއި ރެމްޑިސިވިއެއަރއާއި އަރިދަފުސްރޯގާއަށް ދޭ، ޓޮސިލްޒުމެބް ބޭސް ކަމަށެވެ. އަދި ކޮންމެ ވަރެއްގައި ކޮންމެ ގޮތަކަށް ހުރިނަމަވެސް، މެޑިކަލް އޮކްސިޖަން ހޯދުމަށް ބާރު އެޅުއްވިއެވެ.
އޭނާ ވިދާޅުވިގޮތުގައި އިންޑިއާއިން ހިންގި ކޮވިޑް-19 ޑިޕްލޮމެސީއާއި ގައުމުތަކަށް އެގައުމުގެ ދަތިވަގުތުގައި ވެދިން ބޭހުގެ އެހީގެ ފައިދާ މިހާރު ފެންނަމުންދެއެވެ. އަދި ގުޅުން ބަދަހި ކުރުމުގެ އެރޫހު ހަމަ އެގޮތުގައި ދެމެހެއްޓުމަށް އޭނާ ވިދާޅުވިއެވެ.
އިންޑިއާގެ މަންދޫބުންނާ ވާހަކަ ދައްކަވަމުން އޭނާ ވިދާޅުވީ މިހާރު ދިމާވެފައިވާ އިމަރޖެންސީއަކީ ވަގުތީ ހާލަތެއް ކަމަށެވެ.
ނޫސްވެރިންނާ ވާހަކަ ދައްކަވަމުން އިންޑިއާގެ އެކްސްޓަރނަލް އެފެއާޒް މިނިސްޓަރ ހަރްޝްވަރްދަން ޝްރިންގްލާ ވިދާޅުވީ އިންޑިއާއިން ވަނީ އިންޑިއާއިން ބޭނުންވާ ތަކެތި ފާހަގަ ކޮށްފައެވެ. އަދި އެކަން ވާނީ ގައުމުތަކަށްވެސް އެންގިފައި ކަމަށެވެ.
