ސައޫދީ އަރާމްކޯ ކުންފުންޏާއި އިންޑިއާގެ ރިލައެންސްއިން ދަނީ ފައިސާ ދިނުމާއެކު ދެފަރާތުން ހިއްސާ ބަދަލުކުރުމަށް ވާހަކަ ދައްކަމުންނެވެ. ސައޫދީ ވަލީ ޢަހްދު ބިން ސަލްމާން ދެއްވި އިންޓަރވިއުއެއްގައި ވިދާޅުވީ ދުނިޔޭގެ ތެޔޮ އުފައްދާ އެންމެ ބޮޑު ކުންފުނި ސައޫދީ އާރާމްކޯއިން ދަނީ އެއް ޕަސެންޓް ހިއްސާ ވިއްކުމަށް ބޮޑު ކުންފުންޏަކާ ވާހަކަ ދައްކަމުންނެވެ.
މިއީ ކޮން ކުންފުންޏެއްކަމާއި ކޮން ގައުމެއްކަން ބިން ސަލްމާން ހާމައެއް ނުކުރައްވައެވެ.
އިންޑިއާގެ މަހާސާދާގަރު، މުކޭޝް އަމްބާނީގެ ރިލައެންސް ކުންފުނިން ވަނީ ސައުދީ ކުންފުންޏާއެކު މަޝްވަރާތައް ފަށާފައެވެ. ދުވަސްވެފައިވާ މި މަޝްވަރާތައް ވަނީ މެދުކެނޑިފައެވެ. އެހެން ނަމަވެސް އަލުން ފެށިފައިވާ ކަމަށް ޚަބަރުތައް ބުނެއެވެ.
ރިލައެންސްއިން ބޭނުން ވަނީ އެކުންފުނީގެ ޕެޓްލޯލާއި ކެމިކަލް ކުންފުނީގެ 20 ޕަސެންޓް ހިއްސާއާއި ފައިސާ އާމާރްމކޯއަށް ދީފައި އާރާމްކޯގެ ހިއްސާ ލިބިގަތުމަށެވެ. ރިލައެންސްއިން ހިސާބުކޮށްފައިވާ ގޮތުގައި އެކުންފުނީގެ އަގަކީ 75 ބިލިއަން ޑޮލަރެވެ.
އާރާންކޯއިން ވަނީ ޗައިނާގެ ޒީޖިއާންގ ކުންފުނީގެ ހިއްސާގަނެގެން ޗައިނާގެ ބާޒާރަށް ސާފުނުކުތރާ ތެޔޮ ވިއްކަން ފަށާފައެވެ. އަދި ޗައިނާގައި ސައިނޯޕެކްއާ ގުޅިގެން، ތެޔޮ ވިއްކާ އެއްހާސް ޕެޓްރޯލް ސްޓޭޝަންގެ ހިއްސާވެސް ގަނެފައެވެ.
މީޑިއާ ރިޕޯޓްތައް ލަފާ ކުރާ ގޮތުގައި ރިލައެންސްއާއެކު އާރާމްކޯއިން އެއްބަސްވުމަކަށް އާދެވިއްޖެނަމަ، ދުވާލަކަށް ފަސަ ލައްކަ ފީފާ ތެޔޮ ބޭނުންވާ އިންޑިއާގެ ބާޒާރަށް ފަސޭހަކަމާއެކު ވަދެވި، އިންޑިއާގެ ބާޒާރުގައި ސާބިތުވުމަށް ފުރުސަތެއް ލިބިގެން ދާނެއެވެ.
