ލަންކާގެ އިގްތިސާދު 3.6 ޕަސެންޓަށް ދަށްވެގެން ގޮސްފައިވާ ކަމަށް ހުކުރު ދުވަހު އެގައުމުން ބުނެފިއެވެ. މިއީ 1948ގައި މިނިވަންކަން ލިބުނު ފަހުން އެގައުމުގެ އިގްތިސާދު މިހާ ބޮޑަށް ވެއްޓިގެން ދިޔަ ފުރަތަމަ ފަހަރެވެ.
އެގައުމުގެ މަރުކަޒީ ބޭންކުން ބުނެފައި ވަނީ، 2021 ގައި ލަންކާ އިގްތިސާދުގައި ވަރުޖެހި، ހަ ޕަސެންޓްގެ އިގްތިސާދީ ކުރިއެރުމެއް ލިބޭނެ ކަމަށް އުންމީދު ކުރާ ކަމަށެވެ. އަދި ގައުމުގެ ޚިދުމަތުގެ ދާއިރާއާއި އުފެއްދުމުގެ ދާއިރާ ރަނގަޅުވާނެ ކަމަށްވެސް ވަނީ ލަފާ ކޮށްފައެވެ.
މަރުކަޒީ ބެންކުން ބުނެފައި ވަނީ ކޮރޯނާ ކާރިސާއިން ސާބިތުކޮށްދިނީ ގައުމުގެ އިގްތިސާދުގެ ބަލި ކަށި ދާއިރާތައް ރަނގަޅުކޮށް، އެހެން ދާއިރާތަކަށް ސަމާލުކަން ދޭން ޖެހޭ ކަމަށެވެ. އަދި އިގްތިސާދަށް ފަހި، އުފެއްދުންތެރި ސިނާއަތެއް ބިނާކުރަން ވެސް މިއިން ފުރުސަތު ލިބިގެން ދިޔަ ކަމަށެވެ.
ކޮރޯނާގެ ސަބަބުން ސްރީލަންކާގެ ފަތުރުވެރިކަމަށް ބޮޑު ގެއްލުންތަކެއް ލިބިފައި ވެއެވެ. ކޮންސްޓްރަކްޝަންގެ ދާއިރާއާއި އުފެއްދުންތެރިކާމައި ޚިދުމަތުގެ ދާއިރާއަށް ބޮޑު ހީނަރުކަމަކާ ކުރިމަތިލާން ޖެހުނު ކަމުގައި ބެންކުން ބުނެފައި ވެއެވެ.
ސްރީލަންކާއަށް ދިމާވެފައިވާ އިގްތިސާދީ ހީނަރުކަމުގައި އެގައުމުގެ ދަރަނި ވަނީ ޖީޑީޕީގެ ނިސްބަތުން 101 ޕަސެންޓަށް ބޮޑު ވެގެން ގޮސްފައެވެ. މިދިޔަ އަހަރު ސްރީލަންކާގެ ދަރަނި ހުރީ ޖީޑީޕީގެ ނިސްބަތުން 86.8 އިންސައްތައިގައެވެ.
އިންޓަރނޭޝަނަލް ރޭޓިންގ އެޖެންސީތަކުން ވަނީ ސްރީލަންކާއިން ބޭރު ގައުމުތަކަށް ޚާއްސަކޮށް ޗައިނާއަށް ދަރާފައިވާ ބޮޑު އަދަދުތަކުގެ ދަރަނި، މިހާލަތުގައި ދެއްކި ދާނެ ކަމާމެދު ސުވާލު އުފައްދާފައެވެ.
މީގެ ދެހަފްތާއެއްހާ ދުވަސް ކުރިން ސްރީލަންކާއިން ވަނީ ޗައިނާއިން 500 މިލިއަން އެމެރިކާ ޑޮލަރުގެ ލޯނެއް ނަގާފައެވެ. މީގެ ސަބަބުންވެސް ސްރީލަންކާގެ ފައިސާގެ އަގު ބޮޑުތަނުން ވެއްޓިގެން ދިޔައެވެ.
ޗައިނާގެ ނުފޫޒު ސްރީލަންކާގައި އިތުރުވަމުންދާތީ ހުޅަނގުގެ ގައުމުތަކުން ވަނީ އެކަމަށް އިންޒާރުގެ ރަނގަބީލު ޖަހާފައެވެ.
