އިންޑިއާގެ ގުޖުރާތު ސްޓޭޓްގައި އަނެއްކާވެސް ހަސްފަތާލެއްގައި ރޯވެގެން ބަލި މީހުންތަކެއް އަނދައިގެން ހިނގައްޖެއެވެ. ގުޖުރާތުގެ ހަސްފަތާލުގައި އަލިފާން ރޯވުމުގެ ހާދިސާތައް މިފަހަކަށް އައިސް ރިޕޯޓްކޮށްފައި ވެއެވެ.
މިއަދު އަލިފާން ރޯވީ، ބަރޫޗް ޑިސްޓްރިކްޓްގެ ވެލްފެއަރ ހޮސްޕިޓަލްގައެވެ. މިއަލިފާނުގެ ސަބަބުން، އަނދައިގެންނާއި ފިހިގެންނާއި ނޭވާހާސްވެގެން، ސާދަ ބަލި މީހަކާއި އެމީހުން ކައިރީގައި ތިބި ދެ މީހަކު މަރުވެފައި ވެއެވެ. މިއީ ހަތަރު ބުރީގެ އިމާރާތެކެވެ.
ގުޖުރާތުގެ ޗީފް މިނިސްޓަރ ވަނީ މި މައްސަލަ ތަހްގީގު ކުރުމަށް ދެ މީހެއްގެ މައްޗަށް އެކުލެވޭ ކޮމިޓީއެއް އެކުލަވައި ލައްވާފައެވެ. އަދި މަރުވެފައިވާ ކޮންމެ މީހެއްގެ އާއިލާއަށް ހަތަރު ލައްކަ ރުޕީސް ދިނުމަށްވެސް ނިންމާފައެވެ.
އަލިފާނުން މީހުން މަރުވުމަށް ބީރައްޓެހި ނޫން ގުޖުރާތުގެ ސޫރަތުގައި މިދިޔަ ހަފްތާގައި ވެސް ހަސްފަތާލެއްގައި އަލިފާން ރޯވެ އައިސީޔޫގައި ތިބި ފަސް ޕޭޝަންޓުން މަރުވެފައި ވެއެވެ.
ސޫރަތާއި ބަރޫޗަކީ، ދެ ގަޑިއިރުގެ ދުރުމިނުގައި އޮންނަ ދެ ސިޓީއެވެ.
މިދިޔަ އަހަރު ގުޖުރާތުގެ އަހްމަދު އާބާދާއި ރާޖްކޮޓްގައިވެސް ދެ ހަސްފަތާލުގައި އަލިފާނުގެ ދެ ހާދިސާ ހިނގާފައި ވެއެވެ. އަހްމަދު އާބާދު ހަސްފަތާލުން މަރުވީ އަށް މީހެކެވެ. ރާޖްކޯޓުން މަަރުވީ ހަ މީހެކެވެ.
