އިންޑިއާގައި ކޯވިޑްގެ ކޭސްތައް ހަތަރު ލައްކައަށް އަރައިފިއެވެ. ޑޮކްޓަރަކާއި ބަލި މީހުން މަރުވި ދިއްލީގެ ބާޓްރާ ހަސްފަތާލުން ބުނެފައި ވަނީ އޮކްސިޖަން ސަޕްލައި ކޮށްދޭ ފަރާތްތަކުން އެމީހުންގެ ފޯނަށް އިޖާބަ ދީފައި ނުވާ ކަމަށެވެ.
ބެންގަލޯރ ގައި ކޯވިޑްގެ ހާލަތު ގޮސްވަމުން ދިއުމާ ގުޅިގެން ސްޓޭޓް ސަރުކާރުން ދަނީ ހަތަރު ހާސް އައިސީޔޫ އެނދުތައް ތައްޔާރު ކުރުމަށް މަސައްކަތް ކުރަމުންނެވެ.
ބާޓްރާ ހަސްފަތާލުން މީހުން މަރުވިކަން ވަނީ އިންޑިއާގެ ދިއްލީގެ ހައިކޯޓުގެ ސަމާލުކަމަށް އައިސްފައެވެ. ހައިކޯޓުން ބެންޗުން އިންޑިއާގެ މަރުކަޒީ ސަރުކާރަށް ބުނެފައި ވަނީ "މިހާރު ދެން ފުދިއްޖެ" ކަމަށެވެ. މީހުން މަރުވަމުންދާއިރުވެސް އަޅާނުލައި ތިބެންވީ ތޯވެސް ހައި ކޯޓުގެ ބެންޖުން ވަނީ ސުއޯ މޯޓޯ ކޭސްގައި ސަރުކާރާ ސުއާލުކޮށްފައެވެ.
ހައި ކޯޓުން އިންޑިއާ ސަރުކާރަށް އަންގާފައި ވަނީ މިއަދު ދިއްލީއަށް 490 މެތްރިކް ޓަނުގެ އޮކްސިޖަން ސަޕްލައި ކޮށްދޭން ވާނެ ކަމަށެވެ. ނޫންނަމަ ކޯޓުގެ ހުރުމަތް ކަނޑާލުމުގެ ކުށުގައި ސަރުކާރަށް ފިޔަވަޅު އަޅާނެ ކަމަށެވެ.
ދިއްލީގެ ޗީފް މިނިސްގތަރ އަރްވިންދު ކޭޖިރިވާލް ވިދާޅުވެފައި ވަނީ ސްޕޯޓްސް ކޮމްޕްލެކްސްއާއި އެފަދަ އެހެން ތަންތާގައި އިތުރު އެނދުތައް ބެހެއްޓުމުން މިހާރު ޖުމުލަ ނުވަ ހާސް އެނދު ބެހެއްޓިފައިވާ ކަމަށެވެ. އަދި މިތަންތަނަށް އޮކްސިޖަން ލިބުމުން ހުރިހައި އެނދެއްގައިވެސް އޮކްސިޖަން ފެސިލިޓީ ހުންނާނެ ކަމަށެވެ.
ޗީފް މިނިސްޓަރ ވިދާޅުވިގޮތުގައި ހުރިހައި ހަސްފަތާލެއްގައިވެސް އޮކްސިޖަން މަދުކަމަށް ބުނެފައި ވެއެވެ. އެހެންވެ އަވަސް ގޮތަކަށް ދިއްލީއަށް އޮކްސިޖަން ބޭނުން ވެއެވެ.
ދިއްލީގެ އެމްޕީ ގައުތަމް ގަމްބީރު ވަނީ ބޭރުން 200 އޮކްސިޖަން ކޮންސެންޓްރޭޓަރ ގެނެސްފައި ރައްޔިތުންނަށް ހިލޭ ބަހަން ފަށާފައެވެ.
އިންޑިއާ ސަރުކާރުން ވަނީ އަމިއްލަ ބޭނުމަށް އޮކްސިޖަން ކޮންސެންޓްރޭޓަރ އެތެރެ ކުރުމަށް އާންމު ފަރާތްތަކަށް ހުއްދަ ދީފައެވެ.
