ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުހައްމަދު ނަޝީދަށް ރޭ ދިން ހަމަލާއަކީ އެމަނިކުފާނަށް އަމާޒުކޮށް ދިން ޓެރެރިސްޓް ހަމަލާއެއް ކަމަށް ފުލުހުން މިއަދު ބުނެފިއެވެ.
އެ ހާދިސާއާ ގުޅުގެން ފުލުހުން ނެރުނު ބަޔާނެއްގައި ބުނީ މިހާތަނަށް ލިބިފައިވާ މަޢުލޫމާތާއި ފުލުހުން ހޯދާފައިވާ ހޯދުންތަކަށް ރިއާޔަތްކޮށް މި ހަމަލާ ތަހްގީގުކުރަމުންދަނީ ރައީސް ނަޝީދަށް އަމާޒުކޮށް ދިން ޓެރަރިޒަމްގެ އަމަލެއްގެ ގޮތުގައި ކަމަށެވެ. އަދި ތަހުގީގު ދާއިރާއިންނާއި ފޮރެންސިކްސްގެ ތެރެއިން ފުލުހުންނަށް ލިބެންހުރި ހުރިހާ ވަސީލަތެއް ބޭނުންކުރަމުންދާ ކަމަށް ވެސް ފުލުހުން ބުނެއެވެ.
އޭގެ އިތުރުން، މިތަހުގީގަށް އެހީތެރިވުމަށް އޮސްޓްރޭލިއަން ފެޑެރަލް ޕޮލިސްގެ ފަރާތުން ތަޖުރިބާކާރު ދެ ބޭފުޅެއް މާދަމާގެ ވަގުތެއްގައި ދިވެހިރާއްޖެއަށް އައުމަށްހަމަޖެހިފައިކަން ފުލުހުން ވަނީ ކަށަވަރުކޮށް ދީފައެވެ. އަދި ޔޫއެންއޯޑީސީ ގެ ފަރާތުން ދިވެހިރާއްޖޭގައި މިވަގުތު ތިއްބެވި އިނގިރޭސިވިލާތުގެފަންނީ ދެ ބޭފުޅެއްގެ އެހީތެރިކަން، މި ހަމަލާ ތަހުގީގުކުރުމުގައި ދިވެހި ފުލުހުންގެ ހިދުމަތަށް ލިބެމުންދާ ކަމަށް ފުލުހުން ބުނެއެވެ.
ފުލުހުންގެ ބަޔާނުގައި އިތުރަށް ބުނީ މިހަމަލާއާ ގުޅިގެން ދިވެހި ރައްޔިތުންގެ ސަލާމަތާއި ރައްކާތެރިކަމަށްޓަކައި ދިވެހި ގައުމީ ދިފާއީ ބަރާއި ދިވެހި ފުލުހުންގެ ހިދުމަތް ގުޅިގެން މާލެ ތެރެ ބެލެހެއްޓުމުގައި ހާއްސަ މަސައްކަތްތަކެއް ކުރަމުންދާ ކަމަށްވެސް ފުލުހުން ބުނެއެވެ.
ފުލުހުން ބުނީ ހަމަލާ ދިން ވަގުތު އެސަރަހައްދުން ޝައްކުވާ އެއްވެސްކަމެއް ފާހަގަކުރެވިފައިވާނަމަ، އެ ހަމަލާއާ ގުޅޭގޮތުން މައުލޫމާތު ހިއްސާކުރުމަށް ހާއްސަ ކޮށްފައިވާ ހޮޓްލައިން 9704000 އަށްގުޅުއްވައި ހިއްސާކުރުމަށް އެދޭ ކަމަށެވެ. އެގޮތުން ފޯރުކޮށްދޭ މައުލޫމާތުގެ ސިއްރު ހިފަހައްޓާނެކަމުގެ ޔަގީންކަން ވަނީ ފުލުހުން ވަނީ ދީފައެވެ.
