އިލެކްޝަން ކޮމިޝަން (އީސީ) ގެ މެމްބަރު އަދި އެ ކޮމިޝަންގެ ރައީސް އަޙުމަދު ޝަރީފް އާދަމް އަދިވެސް ހުންނެވީ ކޮމިޝަނުން އިސްތިއުފާ ދެއްވާ ގޮތަށް ކަމަށް އޭނާ ވިދާޅުވެއްޖެއެވެ.
"އަޅުގަނޑުގެ ނިންމުން އަދިވެސް އޮތީ އެގޮތަށް. އެއަށް އެއްވެސް ބަދަލެއް ނާދޭ. އީސީން ވަކިވާ ގޮތަށް އަދި ވެސް އޮތީ،" ޝަރީފް ވިދާޅުވިއެވެ.
އިސްތިއުފާ ދެއްވަން ނިންމަވާފައި ވިޔަސް އެކަން ކުރައްވާނޭ ތާރީޚެއް އަދި ކަނޑައެޅިފައި ނުވާކަމަށް ޝަރީފް ވިދާޅުވިއެވެ. މާނައަކީ ކޮންމެ ވަގުތެއްގައި ވެސް އިސްތިއުފާ ދެއްވައިފާނެއެވެ.
ޝަރީފް ކުރިން ވިދާޅުވެފައިވަނީ އެ ކޮމިޝަނުން އިސްތިއުފާ ދެއްވުމަށްފަހު ވިސްނުން ގެންގުޅުއްވާނީ އެހެން ދިމާއަކުން ކުރިއަށް ދިއުމަށް ކަމަށެވެ. އެހެންނަމަވެސް އެއީ ކޮން ދިމާއަކުން ނުވަތަ ކޮންދާއިރާއަކުން ކަމެއް ވިދާޅެއް ނުވެއެވެ.
ޝަރީފް ކުރިން ވިދާޅުވެފައިވަނީ އިސްތިއުފާ ދެއްވާނީ ލޯކަލް ކައުންސިލް އިންތިޚާބަށްފަހު ކަމަށެވެ. އިންތޚާބު ވެސް ނިމިއްޖެއެވެ. އިންތިޚާބު ކާމިޔާބު ކުރެއްވި ފަރާތްތަކުން މިހާރުވަނީ ހުވާ ވެސް ކުރައްވައިފައެވެ.
އީސީގެ މެމްބަރު ކަމުން އިސްތިއުފާ ދެއްވަން ނިންމެވި ހަގީގީ ސަބަބެއް އޭނާ ހާމައެއް ނުކުރައްވައެވެ. އެހެނަސް ގާނޫނަށް ގެނައި ބަދަލުގެ ސަބަބުން ބައެއް ކަހަލަ ދަތިކަންކަން ހުރުމަކީ އެކަމު ސަބަބު ކަމަށް ބެލެވެއެވެ.
އިސްތިއުފާ ދެއްވަނީ ސަރުކާރުން ހުށަހެޅުމެއް ލިބިގެންތޯ ދެންނެވުމުން އެއަށް ވެސް ޝަރީފް ޖަވާބެއް ނުދެއްވައެވެ.
ޝަރީފަކީ ތަފާތު އެކި ދާއިރާތަކުގައި މަސައްކަތް ކުރައްވައި ތަޖުރިބާ ހޯއްދަވައިފައިވާ ބޭފުޅެކެވެ. އޭނާ ވަނީ ސްކޫލްތައް ހިންގެވުމުގައި ހަރަކާތްތެރިވެވަޑައިގެންފައެވެ. އެފަހުން ވަނީ އަތޮޅުވެރިކަން ކުރައްވައިފައެވެ. އޭގެ އިތުރުން މަޖިލިސް މެމްބަރުކަމާއި އީސީގެ އެސްޖީ ކަމާއި ޕީޕީއެމްގެ އެސްޖީކަން ވެސް ކުރައްވާފައިވެއެވެ.
