އިޒްރޭލުން ގައްޒާއަށް ދެމުންދާ ހަމަލާތައް ހުއްޓާލުމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ގޮވާލައިފިއެވެ.
ރައީސް ނަޝީދު މިކަމަށް ގޮވާލެއްވީ ޖަރުމަނު ވިލާތުގައި ބޭސްފަރުވާއަށް ވަޑައިގެން ހުންނަވައި ކުރެއްވި ޓްވީޓެއްގައެވެ.
ނަޝީދު ކުރެއްވި ޓްވީޓެއްގައި ވިދާޅުވީ ގައްޒާ އަށް ދެމުންދާ ހަމަލަތަކުގެ ހަބަރުތައް ބެލުމުން ލިބެނީ ޝޮކެއް ކަމަށާއި އިޒްރޭލުން ގައްޒާ އަށް ހަމަލާތައް ދިނުން ހުއްޓާލަންޖެހޭ ކަމަށެވެ.
އަދި މިހާރު އަޅާފައިވާ ހުރަސްތައް ނައްތާލައި ފަލަސްތީނުގެ ރައްޔިތުންނަށް އާމްދަނީ ހޯދޭނެ ގޮތާއި ހަމަޖެހިލައިގެން ދިރިއުޅެވޭނެ މަގު ތަނަވަސްކޮށްދޭންޖެހޭ ކަމަށްވެސް ނަޝީދު ވިދާޅުވިއެވެ.
ރާއްޖެ އޮތީ ފަލަސްތީނުގެ ރައްޔިތުންނާއެކު ކަމަށް ވިދާޅުވެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވަނީ "ފްރީ ފަލަސްތީން" ކެންޕެއިންގައި ބައިވެރިވެވަޑައިގެން ޒުވާނުން މިއަދު ކުރިއަށް ގެންދިޔަ ހަރަކާތަށް ހިތްވަރު ދެއްވާފަ އެވެ. ރައީސް ސޯލިހް ވަނީ ފަލަސްތީނުގެ ދިދައާއެކު މުޅި ދުނިޔެެއަށް ވަރުގަދަ މެސެޖެއް ދެއްވާފަ އެވެ. ރައީސް ކުރެއްވި ޓްވީޓެއްގައި ވިދާޅުވީ ރާއްޖެ އޮތީ ފަލަސްތީނުގެ ރައްޔިތުންނާ އެކު ކަމަށެވެ.
