ރާއްޖޭގައި ކޮވިޑް 19 ގެ ހާލަތު އިންތިހާއަށް ގޯސްވަމުން ދިއުމާގުޅިގެން ކުރިން އަޅާފައިވާ ފިޔަވަޅުތައް އަންނަ ބުދަދުވަހުންފެށިގެން ވަރުގަދަ ކުރަން ނިންމާފިއެވެ. ކުރިން ހަވީރު 4:00 އިން ފަތިހު 4:00 އަށް އިއުލާން ކޮށްފައިވާ ކާފިއު ގަޑި ބުދަ ދުވަހުން ފެށިގެން އަމަލުކުރުމަށް ހަމަޖައްސާފައިވަނީ ހަވީރު 4:00 އިން ހެނދުނު 8:00 އާހަމައަށެވެ.
އެޗްއީއޯސީގެ ނޫސްވެރިންގެ ބައްދަލުވުމުގައި ސަރުކާރުގެ ތަރުޖަމާނު މުޙައްމަދު މަބްރޫކް ޢަޒީޒު ވިދާޅުވީ ކޮންމެ ގޭބީސީއަކުން ބޭރަށް ނުކުމެވޭ މީހުންގެ ޢަދަދު މިހާރު ދެ މީހުންނަށް ބަދަލު ކުރަން ނިންމާފައިވާކަމަށެވެ. މި ގޮތަށް އެ ގެއަކުން ނުކުންނަން ބޭނުންވާ ދެމީހުންނަށް ދެ ފާސް ދޫކުރުމަށް ވެސް ނިނަމާފައިވާކަމަށް ވިދާޅުވިއެވެ. ކާފިއު ނޫން ގަޑިތަކުގައިވެސް ބޭރަށް ނުކުމެވޭނީ އެ ފާސް އޮންނަ ފަރާތްތަކަށެވެ. އެ ފާސް ނެތް މީހުން ގެއިން ބޭރަށް ނުކުތުމަކީ މަނާ ކަމެއްކަމަށް ވެސް މަބުރޫކުވަނީ ވިދާޅުވެފައެވެ.
ގޭބީސީ ތަކަށް ދޫކުރާ ފާސް ފުލުހުންގެ ޕޯޓަލް މެދުވެރިކޮށް މިރޭ 8:00 އިން ފެށިގެން ލިބޭނެކަމަށް ޗީފް ސްޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވަނީ ވިދާޅުވެފައެވެ. ގޭބީސީ ތަކަށް ދޫކުރާ ފާސްތައް އެކި ގަޑިތަކަށް ބަހާލެވިފައިވާނެ ކަމަށާއި، އެ ފާސް ދޫކޮށްފައިވާ ފަރާތްނޫން އެހެން ފަރާތަކަށް އެ ފާހުގައި ބޭރަށް ނުކުތުމަކީ މަނާ ކަމެއްކަމަށް ވެސް ޢަބްދުﷲ ޝަރީފު ވިދާޅުވިއެވެ. މި ފާސް ހޯދުމަށްޓަކައި ކަރަންޓް މީޓަރު ވެރިފައި ކުރުމަށްވަނީ ހަމަޖައްސާފައެވެ.
މިގޮތުން އެއްފާސް ދޫކުރެވިފައި އޮންނާނީ ހެނދުނު 8:00 އިން މެންދުރު 12:00 އާ ހަމައަށް ކަމަށާއި، ދެވަނަ ފާސް ދޫކޮށްފައި އޮންނާނީ މެންދުރު 12:00 އިން ހަވީރު 4:00 އާ ހަމައަށެވެ.
މީގެ އިތުރުން ކާފިއު ގަޑީގައި ފިހާރަތަކަށްވަދެ ވިޔަފާރި ކުރުމަކީ ވެސް މަނާކަމެއް ކަމަށާއި، ރެސްޓޯރެންޓް އަދި ކެފޭ ފަދަ ތަންތަނުން ކާފިއު ގަޑީގައި ޓޭކްއަވޭގެ ޚިދުމަތް ދިނުމަކީ ވެސް މަނާކަމެއް ކަމަށްވަނީ ކަނޑައަޅާފައެވެ. މި އެންގުމާ ޚިލާފުވާ ފަރާތްތަށް 5000 ރުފިޔާއިން ޖޫރިމަނާ ކުރުމަށް ވެސް ވަނީ ނިންމާފައެވެ.
މީގެ އިތުރުން މާލެ އާއި ހުޅުމާލެ އާއި ދެމެދު ކާފިއު ގަޑިނޫން އެހެން ގަޑި ތަކުގައި ވެސް ދަތުރު ކުރުންވަނީ މަނާކޮށްފައެވެ. ނަމަވެސް ވިލިމާލެއާއި މާލެއާ ދޭތެރޭ ދަތުރުކުރެވޭ ގޮތަށްވަނީ ހަދާފައެވެ.
ކޮވިޑުގެ ހާލަތު އިތުރަށް ގޯސްވެ ފަންސާސް ހާހަށްވުރެ ގިނަމީހުން މި ބައްޔަށް ފައްސި ވެފައިވާއިރު މިބަލީގައި ނިޔާވި މީހުންގެ ޖުމްލަ ޢަދަދު މިހާރުމިވަނީ 138 އަށް އަރާފައެވެ. މިއަދު އެކަނިވެސް މިހާތަނަށް 9 މީހަކު ވަނީ މި ބަލީގައި ނިޔާވެފައެވެ.
