ކޮވިޑް-19 ގެ ޕެންޑަމިކް މެނޭޖް ކުރުމުގައި ސަރުކާރު ފެއިލްވެފައިވާ ކަމަށް ގަބޫލުފުޅު ނުކުރައްވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު ވިދާޅުވީ ހުޅުމާލޭގައި މިހާރު ހުރި އެދުތަކާއި، އަސީޔޫއާއި، ވެންޓިލޭޓަރު އެދުތަކާއިއެކު މިސަރަހައްދުގައި އެކަށީގެންވާ ވަރަށް ފަރުވާދޭނެ ވަސީލަތް އެބަހުރިކަމަށެވެ. ނަމަވެސް އެންމެބޮޑު ދައްޗަކީ ފަރުވާދޭންތިބި ޑޮކްޓަރުންނާއި ނަރުހުން އެކަށީގެންވާ ވަރަށް ނެތުންކަމަށެވެ. އެމަނިކުފާނު ވިދާޅުވީ މަސައްކަތް ކުރައްވަމުންނީ އަންނަ މަހުގެ މެދު ތެރޭގައި އިތުރު ޑޮކްޓަރުންނާއި، ނަރުހުން ރާއްޖެއަށް ގެނައުމަށް ކަމަށެވެ.
ރައީސް ވިދާޅުވީ ހުޅުމާލޭ ފެސިލިޓީގައި ކޮންމެ 10 ބަލިމީހަކަށް މިވަގުތު ފަރުވާދެމުންދަނީ ނަރުހަކާއި، އެހީތެރިއެއްކަމަށެވެ. ނަމަވެސް މިއީ މަދު އަދަދެއްކަމަށް ގަބޫލު ކުރައްވާކަމަށާއި، ނަމަވެސް ކުރިއަށް އޮތް ތަނުގައި އިތުރު މީހުން ލިބުމުން މިކަން ހައްލު ވެގެންދާނެކަމަށެވެ.
