ހުޅުމާލޭ މެޑިކަލް ފެސިލިޓީ (އެޗްއެމްއެފް) ގައި އޮތް ބަލި މީހަކަށް އަނިޔާކުރި މައްސަލައެއް ބަލަން ފަށައިފި ކަމަށް ފުލުހުން ވިދާޅުވެއްޖެއެވެ.

ފެސިލިޓީގައި އޮތް މީހާއަށް އިހާނެތިކޮށް ހިތައި އަނިޔާކޮށްފައިވަނީ އޭނާ ބަލަން ހަމަޖައްސާފައިވާ ބަންގްލަދޭޝްގެ ފިރިހެނެކެވެ. އެމީހާއަކީ ބަލި މީހާގެ އާއިލާގެ ފަރާތުން ހަމަޖައްސައިފައިވާ މީހެކެވެ. ޢުމުރުން 31 އަހަރުގެ އެމީހާ ބަލިމީހާގެ ގައިގައި ޖަހައި އަނިޔާކުރާ ވީޑިއޯއެއް މިހާރުވަނީ އާންމުވެފައެވެ.

މި މައްސަލައާ ގުޅިގެން ރައީސް އޮފީހުގެ ތަރުޖަމާނު މުޙައްމަދު މަބުރޫކު ޢަޒީޒު ވިދާޅުވީ މިހާރު ބިދޭސީ މީހާވަނީ ބަލިމީހާ ބެލުމުގެ މަސްއޫލިއްޔަތުން ދުރުކޮށްފައި ކަމަށެވެ. އަދި އެކަންވާނީ ބަލި މީހާގެ ޢާއިލާއަށް އަންގާފައި ކަމަށް ވެސް މަބުރޫކު ވިދާޅުވިއެވެ. ފުލުހުން މިހާރު ގެންދަނީ އެ މައްސަލަ ބަލަމުން ކަމަށް ވެސް ވިދާޅުވެފައިވެއެވެ. އެމީހާ ބެލުމުގެ ޒިންމާއާ މިވަގުތު ހަވާލުވެ ތިބީ މެޑިކަލް ފެސިލިޓީގެ ސިއްޙީ ޚިދުމަތްތެރިން ކަމަށް ވެސް މަބްރޫކު ވަނީ ވިދާޅުވެފައެވެ.

ފުލުހުން ވިދާޅުވީ މިމައްސަލަ ފުލުހުނަށް ހުށަހަޅާފައިވަނީ މިއަދު ހަވީރު 4:30 އެހައިކަންހާއިރު ކަމަށެވެ. އެމައްސަލަ ހުށަހެޅީ ހުޅުމާލެ މެޑިކަލް ފެސިލިޓީން ކަމަށް ވެސް ފުލުހުން ވިދާޅުވިއެވެ. މި ހާދިސާގައި އަނިޔާ ލިބިފައިވަނީ ދިވެއްސަކަށެވެ. ފުލުހުން މިހާރުވަނީ ބިދޭސީ މީހާ ހައްޔަރު ކޮށްފައެވެ.

އެޗުއާރުސީއެމުން ވެސް ގެންދަނީ މި މައްސަލަ ބަލަމުންނެވެ. އެތަނުން ވިދާޅުވީ "ހުޅުމާލެ މެޑިކަލް ފެސިލިޓީގައި މިއަދު، ބަލިމީހަކަށް އޭނާގެ އެހީތެރިޔާ އަނިޔާކުރި މައްސަލަ މި ކޮމިޝަނުން ދަނީ ބަލަމުން. އަދި މި މައްސަލަ ބެލުމުގައި ކަމާ ބެހޭ މުއައްސަސާތަކުން އަމަލުކޮށްފައިވާ ގޮތް މި ކޮމިޝަނުން ތަހުގީގު ކުރާނެކަމުގައި ދަންނަވަން،" ކަމަށެވެ.

އިތުރު ލިޔުންތައް ކޮވިޑް 19