ސްރީލަންކާގެ ރައީސްގެ ޚާއްސަ އެދިވަޑައިގަތުމަކަށް، ބަންގްލަދޭޝްއިން 200 މިލިއަން ޑޮލަރިގެ ކަރަންސީ ސޮވޮޕްއެއް ހަދަން ނިންމައިފިއެވެ. ބަނަގްލަދޭޝްއަކީ މިއަހަރު ތެރޭ ލަންކާއާއެކު ކަރަންސީ ސްވޮޕް ކުރުމަށް ނިންމި ފުރަތަމަ ގައުމެވެ.
ފަތުރުވެރިކަމުޖގެ ދާއިރާއާއި ގާމެންޓް އެކްސްޕޯޓް ކުރުމުގެ ދާއިރާއަށް ބޮޑު ހީނަރުކަމެއް ކުރިމަތިވެފައިވާތީ، ސްރީލަންކާއަށް ވަނީ ބޭރު ފައިސާގެ ދަތިކަމަކާ ކުރިމަތިލާން ޖެހިފައެވެ.
ބަންގްލަދޭޝް ބޭންކުން ބުނިގޮތުގައި ބަންގްލަދޭޝްގެ ރިޒާވްއިން މި ފައިސާ ހަމަޖައްސައިދެނީ ތިން މަސްދުވަހުގެ މުއްދަތަށެވެ.
އެޕްރީލް 2021ގައި ސްރީލަންކާގެ ރިޒާވް ހުރީ، 4.5 ބިލިއަން ޑޮލަރުގައެވެ.
މިއަހަރު ސްރީލަންކާއިން ވަނީ ޗައިނާއިން ވެސް 1.5 ބިލިއަން ޑޮލަރުގެ ކަރަންސީ ސްވޮޕް އެއްބަސްވުމެއް ހަދާފައެވެ. މީގެ އިތުރުން 500 މިލިއަން ޑޮލަރިގެ ލޯނެއްވެސް ނަގާފައި ވެއެވެ. އަދި މިދިޔަ އަހަރުވެސް 500 މިލިއަން ޑޮލަރުގެ ލޯނެއް ޗައިނާއިން ނެގިއެވެ. މީގެ ފަނަރަ ދުވަސްކުރިން ސްރީލަންކާއިން ވަނީ ކޮރެއާގެ އެގްޒިމް ބޭންކުންވެސް 500 މިލިއަން ޑޮލަރުގެ ލޯނެއް ނެގުމަށް އެއްބަސްވެފައެވެ.
މީގެ ކުރިން އިންޑިއާއިން ވަނީ ސްރީލަންކާއަށް 400 މިލިއަން ޑޮލަރުގެ ކަރަންސީ ސޮވޮޕެއް ހަދައިދީފައެވެ. އަދި މުއްދަތު އިތުރު ކުރުމަށްފަހު ސްރީލަންކާއިން ވަނީ މިއަހަރުގެ ފެބްރުއަރީގައި މިފައިސާ އަނބުރައި ދައްކާފައެވެ.
ސްރީލަންކާގެ ރައީސް ގޮތާބަޔާ ރާޖަޕަކްސަ ވަނީ އިންޑިއާގެ ބޮޑު ވަޒީރު ނަރެންދްރަ މޮދީއަށް ކުރެއްވި ފޯން ކޯލެއްގައި 1.1 ބިލިއަން ޑޮލަރުގެ އިތުރު ކަރަންސީ ސްވޮޕެއް ހަދައި ދިނުމަށް އެދިފައެވެ.
ކޮވިޑް19ގެ ވަބާއާއެކު ވެސް ބަންގްލަދޭޝްގެ ފޮރިން ރިޒާވް ވަނީ އިތުރުވެގެން ގޮސްފައެވެ. އެޕްރީލް މަހު ބަންގްލަދޭޝްގެ ފޮރިން ރިޒާވް އުޅުނީ 45 ބިލިއން ޑޮލަރުގައެވެ.
