ދެކުނު ޗައިނާ ކަނޑުގައި ފިލިޕީންސްގެ މަސްކަނޑުގައި ޗައިނާއިން މަސްވެރިކަން ކުރުމުން ފިލިޕީންސް މަސްވެރިންގެ އާމްދަނީއަށް ހީނަރުކަމެއް ލިބިފައިވާ ކަމަށް ބުނެ މުޒާހަރާ ކުރަން ފަށައިފިއެވެ.
ދެކުނު ކޮރެއާއިން ހުތުމަތު ކުރާ ގޮތުގައި އެގައުމުގެ މަސްކަނޑަށް ޗައިނާ އުޅަނދުތަކުން ވަދެ ވަގަށް މަސްވެރިކަން ކުރުމުން ތިމަވެށްޓަށްވެސް ބޮޑެތި ގެއްލުންތަކާ ކުރިމަތިލާން ޖެހިފައި ވެއެވެ.
ފިލިޕީންސާއި ޗައިނާއާ ދެމެދު ދެކުނު ޗައިނާ ކަނޑުގެ މައްސަލާގައި އިންޓަރނޭޝަނަލް ޓްރައިބިއުނަލުން ފިލިޕީންސާ އެއްކޮޅަށް ޙުކުމް ކުރުމުންވެސް ޗައިނާ އިން ވަނީ އެއަށް ބޯލަނބާނުލާނެ ކަމަށް ބުނެފައެވެ. ޗައިނާއިން ދެކުނު ޗައިނާ ކަނޑުގައި ފިލިޕީންސްގެ ރަށްތަކާއި އަތޮޅުތަކަށް އަތް ގަދަ ކުރުމުގެ އިތުރުން ފިލިޕީންސްގެ މަސްވެރިން އެސަރަހައްދަށް ވަނުމުން ފައްސާލައެވެ.
ކޮވިޑްގެ ހާލަތާ ގުޅިގެން މަސްވެރިންނަށް އިތުރު އާމްދަނީ ލިބޭނެ ގޮތްތަކެއް ނެތް ކަމަށާއި ކޮންސްޓްރަކްޝަންނގެ ދާއިރާވެސް ހުއްޓުމަކަށް އައިސްފައިވާ ކަމަށް އެމީހުން ބުނެއެވެ.
އިއްޔެ މުޒާހަރާ އަށް ނިކުތް މީހުން ސަރުކާރަށް ގޮވާލާފައިވަނީ ޗައިނާ މީހުންގެ އުދަގޫތަކުން މަސްވެރިން ރައްކާތެރިކޮށް ދިނުމަށެވެ.
ދެކުނު ކޮރެއާގެ ސަރަހައްދަށް ޗައިނާއިން ވަގަށް ވަދެ ދާއަޅައިގެން މަސްވެރިކަން ކުރަމުންދާތީ، ސޯލް އިން ވަނީ އެކަމާ މެދު ޝަކުވާ ކޮށްފައެވެ. ދެކުނު ކޮރެއާއާއި އުތުރު ކޮރެއާއާ ދެމެދު، ޔެލޯ ސީގައި ޗައިނާގެ 118 މަސް ބޯޓަކުން ރޭގަނޑު ވަދެ ދާއަޅާ ކަމަށާއި އޭގެ ސަބަބުން އެހިސާބުގެ ތިމާވެށްޓަށް ގެއްލުން ލިބެމުންދާ ކަމަށް ބުނެ، ސޯލްއިން ވަނީ އިހުތިޖާޖް ކޮށްފައެވެ.
ޗައިނާގެ މަސްބޯޓްތަކަކީ، ޗައިނާގެ ކަނޑުގެ ސިފައިންނާއި ކޯސްޓްގާޑުގެ އެހީތެރިކަން ލިބިގެން އަވަށްޓެރިންނަށް އުދަގޫކޮށް މަސްހިފަން އުޅޭ މަސްވެރިންގެ މިލީޝިއާ ކަމަށް އަވަށްޓެރިން ތުހުމަތު ކުރެއެވެ.
