ބެއިޖިންގއިން ފުރައިގެން މަޑު ނުކޮށް އެމެރިކާއަށް ދަތުރުކޮށް، އެމެރިކާގެ އަސްކަރީ މަރުކަޒުތަކަށް ނިއުކްލިއަރ ބޮމެއް އަޅާވަރުގެ މަތިންދާ ބޯޓް އުފައްދާފައިވާ ކަމަށް ޗައިނާއިން ބުނެފިއެވެ.
ޗައިނާއިން ހާމަ ކޮށްފައިވާ ފޮޓޯތަކުން ދައްކަނީ ޝިއާން އެޗް20 މަރުކާގެ މަތިން ދާބޯޓެކެވެ. މިބޯޓްގެ ސިފަ އެންމެ ބޮޑަށް ވައްތަރީ އެމެރިކާގެ ސްޓެލްތު މަތިންދާބޯޓްތަކާ އެވެ. ޗައިނާއިން ބުނިގޮތުގައި މި ބޯޓް ފަސް ހާސް މޭލަށް ހުއްޓުމެއް ނެތި ދަތުރު ކުރެވޭނެ ކަމަށެވެ. އެއީ، އެމެރިކާގެ ގުއާމް އާއި އެހެނިހެން އަސްކަރީ މަރުކަޒުތަކަށް ފަސޭހަކަމާއެކު ފޯރާވަރުގެ ރާސްތާއެކެވެ.
ޗައިނާއިން އެމެރިކާގެ އަސްކަރީ ސާމާނަށް ޖާސޫސްކުރަމުންދާ ކަމަށް އަސްކަރީ މީޑިއާއިން އަބަދުވެސް ތުހުމަތު ކުރެއެވެ. އެމެރިކާގެ ސްޓެލްތު ބޮމާއާ އެއްވައްތަރުގެ މަތިންދާބޯޓެއް ޗައިނާއިން ތަރައްގީ ކުރަމުންދާ ކަމަށް ވާހަކަ ދެކެވޭތާ ދުވަސްކޮޅެއް ވެއްޖެއެވެ. މިކަން ކަށަވަރު ވެގެން ދިޔައީ މި ބޯޓް އުފެއްދި ޗައިނާ ނޯރތު އިންޑަސްޓްރީ ގްރޫޕާ ހަވާލާދީ، މިވާހަކަ މޮޑަން ވޭޕަންރީ މަޖައްލާއިން ޝާއިއުކުރުމުންނެވެ.
