އިޒްރޭލުން ފަލަސްތީނަށް ދީފައިވާ 11 ދުވަހުގެ އުދުވާނީ ހަމަލާތައް ތަހްގީގު ކުރުމަށް އިންސާނީ ހައްގުތަކާ ބެހޭ އދގެ މަޖިލީހުން ނިންމުމުން އިޒްރޭލުން އެކަމަށް ފާޑު ކިޔައިފިއެވެ. އިޒްރޭލު ބޮޑު ވަޒީރު ނަތަންޔާހޫ ބުނެފައި ވަނީ އެއީ ލަދު ހުތުރު ކަމެއް ކަމަށެވެ. އަދި އޭނާ ސިފަ ކުރި ގޮތގައި ހިއުމަން ރައިޓްސް ކައުންސިލުން އުޅެނީ އިޒްރޭލާ ޖައްސާލައިގެންނެވެ.
އދގެ ހިއުމަން ރައިޓްސް ކައުންސިލުން ނިންމާފައި ވަނީ ފަލަސްތީނާއި އިޒްރޭލްގައި މި 11 ދުވަހު ހިނގާފައިވާ ކަންތައްތަކާއި މި ކަމުގެ ސަބަބުތައް ހޯދުމަށް ނިންމާފައެވެ.
ފަލަސްތީނުގެ ފޮރިން މިނިސްޓްރީން ވަނީ ހިއުމަން ރައިޓްސް ކައުންސިލްގެ ނިންމުމަށް މަރުޙަބާ ކިޔާފައެވެ. 47 މެންބަރުންގެ ހާޒިރުގައި 24 މެމްބަރުންގެ ތާއީދާއެކު ނިންމާފައިވާ ނިންމުމަށް ޙަމާސް ޖަމާއަތުންވެސް ވަނީ މަރުޙަބާ ކިޔާފައެވެ.
އިޒްރޭލާއި ބައިނަލްއަގްވާމީ ފަރާތްތަކުން ސިފަ ކޮށްފައިވާ ގޮތުގައި އިޒްރޭލިގެ އަމަލުތަކަކީ ހަނގުރާމައިގެ ޖަރީމާތަކެކެވެ. ކުރިން އިޒްރޭލާ ދެކޮޅަށް ފާޑު ނުކިޔޭ މިންވަރަށް އެންމެ ފަހު ހަމަލާގައި އިޒްރޭލަށް ފާޑުކިޔުންތައް އަމާޒުކޮށްފައި ވެއެވެ.
